Shillong, K’lyngkot 02 : Haba jubab ia ka jingbyrngem pyniap jong ka seng Hynniewtrep National Liberation Council (HNLC), u MLA ka NPP na Sohra Bah Gavin Mylliem ula ong ba ka jingtynrong tang ha u ia ka jingkitkhlieh halor ka jingkhyllem ka MCCL ka dei ka bym don nongrim satia.
Ula ong “Ka dei ka kam biej ban shu pynkit ha nga marwei halor ka rai ban khangdam noh ia kane ka karkhana dewbilat ha Sohra”.
Ha ka kyrwoh bala pyllait hynne ka sngi Ba-ar, u MLA ka Sohra ula ong “Ka kyrwoh khubor ba dang shen jong ka HNLC pyrshah ia nga kum u Nongmihkhmat paidbah ka Sohra bad tyngrong ia ka jingkitkhlieh ha nga halor ka jingkyllem ka MCCL bad kumjuh ruh ia ka jingiakren ka Sorkar ban khangdam noh ia ka MCCL bad ban pyntreikam da ka VRS ia ki Nongtrei ka dei ka bym don nongrim satia hangno hangno ruh”.
Une u MLA ula ong ba baroh ki nongshongshnong ki tip ba kano kano ka rai bala shim da ka Sorkar ka dei kaba la iarai lang ym ka rai ba shim da u riewshimet ne uno uno u nongmihkhmat. “Ka long biej ba ka HNLC kan pynman ba dei ma nga, kum u riew shimet marwei ba hap ban shim ia ka jingkitkhlieh halor ka rai bala shim da ka Sorkar” ula ong.
Haba jubab halor ka jingdawa ba iehnoh ia ka kam MLA da ka HNLC, u Bah Gavin ula ong ba u dei uba la shah jied ha ki paidbah ka 28-Sohra Constituency naduh u snem 2018 ter ter bad un iai bteng ban shakri ia ki paidbah ka constituency kat kum ka lynti jong ka ain.
“Ki paidbah ka constituency jong nga ki tip bha ba ngam ju kynran dien haba pyrshang ban shakri ia ki briew jong nga da ka jinglehhok bad jingaiti, kaba la paw na ki kam pynroi kiba la mih hapoh ka constituency jong nga naduh ba nga la shiti ia ka kam kum u MLA” ong u Bah Gavin.
U Bah Gavin ula pynshai ruh ba katto katne ki briew ki tip bha ba ka kompani MCCL, bad ki jaka ba ka treikam, ki dei kiba hap khambun eh ha Shella Constituency ym ha Sohra Constituency kumba sngew da kiba bun balang.
“Kane hi kala biang eh ka daw ia u MLA ka Sohra ba un ym sngewkhia than ia ki kam jong ka MCCL bad ban ieh beit ia kiei kiei baroh ha u MLA ka Shella” ula ong.
Hynrei, kum u Nongmihkhmat, u Bah Gavun ula ong ba ula dep pynsngew bunsien ia ka jingsngewkhia halor ka kam MCCL hapoh ka Iingdorbar Thaw Ain ka Jylla namar ka don jingktah ruh ia kiba bun ki briew la ka dei n aka constituency jong u lane kim dei ruh.
U Bah Gavin ula kynthoh shuh shuh halor ka jingbyrngem pyniap bad ong ba ka jingkynnoh ia u ka dei kabym don nongrim namar ula shah jied ban long MLA tang hadien u snem 2018, ha kaba haduh kane ka por, ka MCCL kala ring swai lypa.
“Lada dei ban kylli jingkylli bad lada dei ban tynrong ia ka jingkitkhlieh, ki dei ban kdew ia ki kti sha ki briew kiba la treikam ha ki kyrdan bapher bapher naduh u snem 2007 ter ter ha ka por ba ka jingtreikam jong ka karkhana kala sdang ban swai” ong une u MLA.
Haba niew ia kane ka jingbyrngem ka HNLC kum ka jingialam bakla, une u MLA ula ong ba kane ka dei ka sien kaba nyngkong ba kane ka kynhun bala khein beain, kala pynmih ia ka jingbyrngem paidbah ia ki MLA kaba pyni ruh ba “Ka jingbyrngem ka dei u soh jong ka jingleh politics ki khwan myntoi shimet”.
“Namar kata, nga sngew ba kane ka jingbyrngem bakla jong ka HNLC ka dei kaba la pynshong nongrim halor ki jingtip kiba bakla bad ka jingbym tip bha ia kaei kaba jia, bad nga kyrmen baka HNLC kan kiar naka jingpynmih ia kum kine ki jingbyrngem ba khlem nongrim nangne shakhmat” ula ong.
