Shillong, K’lyngkot 02 : Ka Tnad Pulit kala maham ia ki nongniah kali ba kim dei ban knieh tam jubor ne ‘Overtake’ haba ki niah ia ki kali ha shi lynter ka surok ba poi sha Jingkieng Umiam.
Ha ka kyrwoh bala pyllait hynne ka sngi Ba-ar, u Superintendent of Police (City) Bah Vivek Syiem ula ong ba namar ka jingmaramot ia ka jingkieng Umiam ka dang iaid shaid shaid, kaba la pyntrei bad miet bad sngi, ia ki kali la shah ban iaid na baroh arliang da ki pali pali shiliang shiliang.
“Hynrei, la shem ba katto katne ki kali kila knieh tam jubor haba iaid lyngba ka jingkieng Umiam kaba lam sha ka jingdheng kali. Kumta, khnang ban pynthikna ia ka jingiaid lynti kaba shngain, la kyntu ia ki nongniah kali ba kim dei ban knieh tam jubor” ula ong.
Ula maham ruh ba kino kino kiba pynkhein ne ialeh pyrshah, kin shah bat bad shah pynngat ha ki kyndon ain.
Nalor kane, ban pynduna ia ka jingiaid ki kali ha surok sha Jingkieng bad ban kiar na ka jingdheng kali, la kyntu ia ki nongniah kali ba kin iaid lang noh na Shillong Bypass, ong u SP.
