Guwahati, K’lyngkot 02: U Myntri Rangbah ka Assam Himanta Biswa Sarma ula pyntip ia ki paidbah ba ki kam thombor pyrshah ia ki kynthei kala hiar sha ka 50%.
Haba iakren bad ki nongthoh khubor, u Himanta Biswa ula ong”Ha u snem 2021, ka kam bymman pyrshah ia ki kynthei kala kot haduh 30,000 bad ha u 2023, kala hiar sha ka 7453, kaba pyni ia ka jinghiar bun hajar shah. Ki kam bymman baroh lang ha u 2021 ka long 1,33,000 hynrei mynta kala hiar sha ka 63,000 ha u 2023. Ka jinghiar ki kam bymman kala kot ia ka 50%”.
U Himanta ula kdew ruh ba ha u snem 2021, ka jingdon ki jingtohkit ba sahteng ha Jylla ka long 1,33,000 hynrei ha u 2023, kala hiar sha ka 26,000.
Ula iathuh ba ha Majuli, ym shym la don shuh ki kam bymman ba dang sahteng ka jingtohkit kat haduh ka 29 tarik Nohprah, 2023.
U pyntip ba ka jingpynsajia ia ki nongleh kam bymman ha u 2021 ka kot tang 6 % hynrei ha u 2023 kala kiew sha ka 17%.
“Ngi phaikhmat ban lah pynkot ia ka jingpynsajia ia ki nongleh kam bymman sha ka 40% hapoh u snem 2026” ula ong.
