Shillong, Nohprah 31: Hadien ka jingpynsangeh ia ka Mega Music Festival jong u snem 2022 na kadaw ka jingjia Mukroh, kane ka tamasa ka la urlong biang hynnin ka sngi saitjain ha madan Polo, Shillong.
Kane ka Mega Music Festival ka dei ruh kaba la pyn iasnoh lang bad ka Cherry Blossom New Year Countdown 2023 kaba un wan iashim bynta da u nongrwai ba paw nam uba dei u nong Jamaica-America, u Sean Kingston uba la pynmih ia bun ki jingrwai ba iaid iew bha ba kynthup ia ka “Beautiful Girls” bad “Fire Burning”.
Kane ka finale kala sakhi ia ka jingkiew rynsan ki 5 tylli ki kynhun tem kiba la pyni ia ka sap tem bad ka jingtbit, kaba la pynshongshit shikatdei eh ia u paidbah. Kine ki kynhun ki dei :
Dappest x Adl
Rum and Monkeys
Larger than 90
Symphonic Illusions
Rijune
Ki nongjop kane ka Mega Music Festival kin ioh rah ia ka song tyngka kaba 25lak ryngkat bad ka international tour.
U Sean Kingston kum shibynta jong ka India Tour, ula wan iuhkjat ha Meghalaya bad hynnin ka sngi Saitjain, ula pynlong ia ka concert ha Tura kaba la sakhi ia ka jingtuid ki paidbah na kylleng ki jaka.
Mynta ka sngi, une u Nongrwai na America un wan ban rwai sa ha madan Polo, Shillong ban pynshongshit ia ka jingap snem thymmai jong ki paidbah ka Jylla.
