Shillong, Naitung 26 : U Myntri Rangbah ka Jylla Conrad Kongkal Sangma hynne ka sngi ba-ar, ula kyntait ba u ai ia kano kano ka hukum ban siat iap ia u Nongialam bad MDC ka BJP na Tura u Bernard N Marak bad ong ba kaei kaba ki Pulit ki leh ka dei kaba la leh halor ki sakhi satar.
“Ka jingkylli kam mih satia ba nga ai ia kano kano ka hukum ba kum katei” ong u Conrad haba jubab ia ka jingkylli halor ka jingkynnoh u Bernard ba u CM ula ai ka hukum ba kyrpang ban siat iap beit beit ia u (Bernard).
U Myntri Rangbah ula ban jur ruh ba u khlem tuklar eiei ruh em ia ka jingtohkit jong ki Pulit hadien ba ki iohpdiang ia ka jingujor na ka imlang sahlang halor ki kam bymman ba jia ha ka Farm shimet jong une u MDC ka BJP.
“Naduh ka sngi ba nyngkong, kaei kaba jia ka dei kaba jia kat kum ki lynti ka ain bad jia ruh kat kum ki sakhi satar. Ki (Pulit) kila buddien ia baroh ki kam ha kane ka farmhouse kat kum ka lynti jong ka ain bad kam shym la don satia ha kano kano ka khep ba kan don ka jingtuklar lane ka jingai jingmut na ka liang ka jong nga ia kaei kaei kaba dei ban leh ne bym leh halor kane ka jingkhynra kaba la pynlong” ula ong.
Halor ka jingpyntip ia kane ka jingkhynra, u Conrad ula ong ba ula bthah ia ki Ophisar ban pynthikna ba ki dei ban iaid kat kum ka lynti jong ka ain bad kano kano ka kam ba ki leh ka dei ban long kat kum ki sakhi satar.
Haduh 73 ngut ki briew kila shah kem bad 5 ngut ki khynnah la ioh ban pyllait ha ka jingkhynra jong ki Pulit, kaba lam sha ka jingioh kyndang ia ka kam khaii met ha kane ka farm bala ai kyrteng ka Rimpu Bagan. Kane kala wan jia hadien ba ki Pulit kila ioh pdiang ia ka jingujpr ha ka 28 tarik Rymphang, ba kynnoh ba kawei ka Khynnah kala shah leh beijot la bun sien ha kane ka farm u Bernard.
Halor ka jingkam u Bernard ba ka BJP kala buh jingma ia ka NPP, u Myntri Rangbah ula ong “Ka Elekshon hi ka dei ka elekshon bad kaei kaba dei ban jia ai kan jia. Ngam tharai baka long kaba donkam iano iano ruh ban pyniasoh ia ka elekshon bad kane ka kam bymman namar kumba nga ong, kaei kaba ki Pulit ki leh ka dei halor ka jingioh pdiang ia ki jingujor kynthup na ki riew paidbah, ki Shnong ki Thaw bad kumjuh ruh ki Sengbhalang”.
“Kaba khatduh hi ka dei ka jingphla jong I Khynnah iba la shah leh beijot la bunsien ha kane ka farmhouse. Haba kum kine ki jingphla ki mih, ki Pulit kila sdang ban tohkit bad katba dang iaid ka por, kila ioh ban lum ia bun bah ki sakhi satar. Wat hapdeng kine kiei kiei, ngam pat ju tuklar ia kane ka kam” ula ong.
Haba kdew ia ka jingkynnoh ba ka jingkhynra ki Pulit ka dei kaba la leh da ka jingiasuhbuit, u Myntri Rangbah ula ong “Lada phi peit na ki sakhi, ngam tahari ba ka dang donkam ban iapyrkhat bad ngi la tip ia kaei kaba jia hapoh kane ka jaka namart ki sakhi kiba la lap bad ki kam kiba jam bad ki jingphla kiba la mih na ki riewshimet, kala pynpaw shai ba ka don kaei re kaei ha kane ka jaka”.
Haba pynpaw ba ka jingkhynra ki Pulit kam don bynta satia bad ka kam sain pyrthei, u Conrad ula ong “Kane kam don bynta eiei ia ka jinglong kyrtong iakhun elekshon jong nga lane kino kino ki briew kiba iakhun pyrshah iano iano ruh. Kane ka dei beit na kaei kaba jia ha kane ka jaka kaba la pynshong nongrim kat kum ki sakhi bad ki jingiathuh jong ki briew nalor ki jingujor kiba la mih”.
U Myntri Rangbah ula kular ia ki nongshongshnong ba ki sakhi satar bala ioh lum da ki Pulit ki dei kiba khlain bad ka dei ka case kaba khlain bha ia ki Pulit pyrshah ia une u MDC ka BJP.
“Nga kwah ban kyntu ia ki Nongialam sain pyrthei ba ha kum kine ki jingjia, ngi dei ban sngewthuh ia kaei kaba jia bad ban pyrshang leh ia kaei kaba dei namar kum kine ki kam kin don jingktah beit ia ki samla jong ka Jylla” ula ong.
