Rakhe ka KHADC ban pdiang ia ka Khristmas, iaroh u CM ia ka jingtreikam u CEM ba mynta

Shillong Nohprah 22: Ka Khasi Hills Autonomous District Council (KHADC) hynne ka sngi Thohdieng kala pynlong ia ka jingrakhe ban pdiang ia ka jingwan ka Kristmas bad Snem Thymmai bad kane kadei ka sien kaba nyngkong eh ban pynlong ia kum kane ka jingrakhe hapoh Council kaba la long kaba shongkun bha.

Ha kane ka jingrakhe la wan ban iadonlang u Myntri Rangbah ka jylla Conrad K Sangma ha ka jingiadonlang u CEM ka KHADC Bah Pyniaid Sing Syiem, ki MDC, ki ophisar bad ki nongtrei jong ka KHADC.

Haba ai jingkren ha kane ka sngi, u Myntri Rangbah ula ong, naduh ba u Bah Pyniaid Syiem ula shimti kum u CEM kala don ka jingiatreilang kaba iajan bha hapdeng ka KHADC bad ka sorkar jylla bad ula ong ba u CEM ula trei shitom ban phah ia ki jingtyrwa bapher bapher sha Delhi bad ka Council kala ioh ruh ia kiba bun ki kam pynroi.

Ula ong ba ka sorkar pdeng kala dap da ka jingsngewtynnad ia ki jingtyrwa kiba la phah da ka KHADC bad na ka liang jong ka sorkar jylla ruh kala shimkhia lang halor kine ki jingtyrwa jong ka KHADC bad u ngeit skhem ba ka Council kan sa ioh pdiang bun ki kam pynroi.

“Ngin bteng ban ia treilang hapdeng ka KHADC bad ka sorkar jylla na ka bynta ka bha ka miat jong ki paidbah” ong u Myntri Rangbah.

U Conrad ula ong ruh ba kadei ka sien kaba nyngkong eh ia u ban iashimbynta lang ha ka jingrakhe kaba la pynlong hapoh KHADC bad u sngewtynnad ruh ban tip ba ha ka sien kaba nyngkong eh, ka KHADC ba la pynlong ia kum kane ka jingrakhe bad jingialeh kmen.
Ha kane ka jingrakhe la ioh ruh ia ki jingrwai kyrpang na u MDC ka Mawhati Bah Charles Marngar, u MDC ba shu thung Bah Bindo M Lanong bad ka jingrwai kynhun na ki MDC.

Nalor kane la ioh ruh ia ki jingrwai na ki nongtrei jong ka Council bad na ki kynhun bapher bapher kiba la rwai ia ki jingrwai Krismas kiba la pynsngewtynnad bad pynrhem ia ka mynsiem jong baroh kiba iashimbynta.