Shillong, Nohprah 21: Ka Khasi Students’ Union (KSU) hynne ka sngi Palei kala kyntu iaka Myntri ka tnat ka koit ka khiah ka Kong Ampareen Lyngdoh ba kan tuklar halor ka jingthungkam hapoh ka North Eastern Indira Gandhi Regional Institute of Health and Medical Sciences (NEIGRIHMS).
Haka shithi ka Kong Ampareen, president ka KSU u samla Lambokstarwell Marngar ula ong ba haka 25 tarik Nailar ka Hospital kala pyllait jingpynbna ba laitkam Nursing Officer 194 tylli daka AIIMS New Delhi lyngba ka NORCET-5 haka ba 175 tylli ki kam la mang naka bynta ki shynrang bad 19 tylli ki kynthei hynrei kaei kaba la pynbitar iaka seng ka long tang 15 ngut kidei napoh ka Jylla.
“Ka kam Nursing ka dei ka kam ba ju trei bha ki kynthei bad ka jingdon ki Nongtrei hapdeng ki Kynthei bad ki Shynrang ka long 80:20 hynrei sngewsih ban iohi ba kane ka long khongpong ha NEIGRIHMS” ong u Bah Lambok haba bynrap ba kine kiba shah jied ki dei ki bym pat ju trei hynrei ki dei kiba dang shu pyndep iaka eksamin nala ki jaka pule khlem kano kano ka jingtip shaphang ka rukom trei ka ban kyrshan ia ka jingiohkam jong ki bad kane kan ktah ia ka shakri kaban ai sha ki paidbah haka koit ka khiah”.
U Bah Lambok ula ong ba iaka kam Group B bad C la pynlong eksamin daka HLL lyngba ka CBT mode.
“La iohi ba bun ki samla trai Ri kim shym la ioh ban thoh iaka eksamin namar ki ioh jaka ha Guwahati, Jorhat, Dibrugarh bad Delhi. Kane ka khanglad iaki samla ka Jylla bad ki jingkylli haba iadei bad ka kam Record Clerk ki wan haka ktien Hindi kaba la pynkhien iaki kyndon bad syllabus,” ula ong.
Ula ong ba ka seng kam iahap satia ba ki samla ka Jylla kin hap leit sha kiwei ki Jylla ban thoh iaka eksamin bad kane kam dei ka sien ba nyngkong ban jia kumne bad naka liang ka seng ka pyrshah jur halor kane.
“Kane ka jingleh ka Agency ka pynduh mynsiem iaki samla trai Ri bad kane ka dei hi ba la bthah da mano re mano ba don haka bor ban aikam ia kiwei ki briew na kiwei ki Jylla bad ban khanglad iaki samla trai Ri ban ioh kam” ula ong.
U samla Lambok ula ong ba ka seng kala ioh jingtip ba ka Hospital kala dep ban phah iaki shithi thep kam sha kito kiba la dep ban ithuh lypa khlem da bishar bniah iaki kot ki sla ba donkam.
