Bengaluru, Naitung 26 : Ka tnat Central Crime Branch ka Bengaluru ka la kem noh ia uwei u samla u ba la shah ialam bakla u ba dei na Assam, bad ka jingtohkit ka la iaid shakhmat ban lapdien la u don bynta ne em bad kino kino ki kynhun seng lehnoh.
U Akhtar Hussain Lashkar u ba trei kum u nong pynpoi mar bam u la shah rah noh ha ki pulit ha kane ka miet sngi U Blei ba la lah napoh kawei ka flat ba shu wai ha ka mala ka ba lai jong ka iing ha Tilaknagar ka jaka ha ka ba u la shong la sah ha ryngkat bad ki katto katne ngut ki briew ki ba trei ia kane ka juh ka kam.
Na ka liang u Myntri kam pohiing u Araga Jnanendra u la ong hynnin ka sngi Nyngkong ba ki bor pulit ki la kem noh ruh ia ki paralok ki jong u na ka bynta ban pynlong ia ka jingtohkit.
Ka tyllong khubor pulit ka la ong ba u Lashkar u la ngat pynngat ha ki ba bun ki kyndon jong ka Indian Penal Code, ka ba kynthup halor ka jingpyrshang ban hiar thma ia ka sorkar India. U la ong ruh ba une u samla u dei u ba la shah ialam bakla jur.
“Ngi la iatrei ryngkat lang bad kiwei pat ki tnat treikam bapher bapher. Ngi la kem noh ia u bad la rejistar case pyrshah ia u. Ka jingtohkit ka la iaid shakhmat ban lapdien la u donkti ne em bad kino kino ki kynhun seng lehnoh,” ong u Police Commissioner ka Bengaluru u C H Pratap Reddy lyngba ki lad pathai khubor.“
“Ngim pat lah ban iathuh bniah halor kane ka phang, hynrei ka jingshisha ka long ba la rejitar FIR bad la kem noh ia une u briew. Ki la don ki sakhi satar ki ba biang halor une u samla u ba la shah ialam bakla ha Bengaluru,” ong shuh shuh utei u heh pulit.
