Shillong, Nohprah 19: Kane ka aiom jong u snem kaba sngewtynnad tam ha kaba baroh ki dang bunkam ha ka ban pynkhreh ia kane ka aiom lehkmen. Ka jingpynieng bad ka jingpynitynnad iaki Christmas Tree ne dieng Krismas ha ryngkat bad ka jingpynpun ia ki light bad ka jingbuh ia ki jingbuhkai kiba itynnad ne ‘Decoration’ hynrei kaba kham kongsan tam ka dei kaba ki riewngeit ki buh jingduwai. Ka jingrakheia ka Khristmas ka dei kaba heh bha ha Meghalaya khamtam ha ki Iingmane.
KA SHLEM ka wanrah sha phi ia ki 5 tylli ki ïingmane kiba don ha Meghalaya kiba biang tam ban leit ha ka por Christmas ban pynlong ia kane ka jingrakhe kaba sngewtynnad bad kaba sngewkmen.
1.Ka Mary Help of Christians Cathedral, Shillong : Kaei kaba kham sngewtynnad tam ban ia kaba don hapoh jong kane ka Iingmane Cathedral kaba hehduh, kaba sawa da ki jingrwai Khristmas jong ki kynhun Choir bapher bapher. Ia kane ka ïingmane baroh kawei la pynitynnad da ki jingbuhki kiba itynnad kiba la pynpur da ki ‘Lights’ bad kaba khring ia ki paidbah na kylleng ki jaka jong ka jylla bad wat nabar ruh kumjuh.
2.Ka All Saints Church Shillong: Kadei ka ïingmane kaba la rim tam ha nongbah Shillong kaba dela shna naduh ki por jong ki phareng, kaba don ruh ia ki dieng kiba jrong da ki spah phut kiba la pynpur da ki light ban pynlong kum ki dieng Khristas kiba pyniapbiej ia ki nongleit jongwan. Ka ïingmane ka ju pynlong ruh iaka JIngiaseng Christmas ba Kyrpang ha ka sngi Christmas kaba dei ka sngi kaba la kha ia u Jisu Khrist.
3.Ka Tura Baptist Church, Tura: Kane ka ïingmane ka dei kaba la tei ha u snem 1878 bad ka don ha Mission Compound, bad ka ka dei ka jaka kaba dei ban leit khnang lada don hapoh Tura, West Garo Hills. Ki nongrwai Choir ka Ri-lum Garo ki pynmyllung da ki jingrwai kibadap da ka jingkmen, jingkyrmen bad jingieid. Ka Khristmas ka wanrah iaka jinglong kawei bad na ka liang jong ka Tura Baptist Church ka ialeh ban don iaka jingtylli lyngba ki jingialap bad jingduwai, da kaba pynitylli ia baroh kiba ngeit haka kyrteng jong u Trai Jisu Khrist. Ka jingitynnad jong ka jinglong jingman ka jaka ryngkat bad ka jingpynitynnad ia ki Khristmas Tree ym tang ba kala pynrhem iaka mynsiem Khristmas hynrei ka long ruh kum ka jaka kaba biang bha ban shondur bad ban pynsaphriang ia ki ha ki rynsan Social Media.
4.Ka Sacred Heart Shrine, Tura: Ka Sacred Heart Shrine kaba don ha Tura kadei kaba la pynitynnad bad pynbhabriew bha naka bynta kane ka sngi kaba kyrpang, ha kaba da ki hajar ngut ki riewngeit ki ju leit ban iashimbynta ha ki jingiaseng kiba kyrpang kiba la pynlong ha kane ka ïingmane. Kane ka ïingmane kadei kaba la don 50 snem bad haka sngi rakhe ia ka Christmas, ka long ka jaka kaba paka tam kaba pynkhie im iaka mynsiem jong ka jingrakhe ia ka Khristmas da ka jinglong kyrpang kane ka jaka bad ka jingpynitynnad kaba shongkun bha.
5.Moolamylliang Presbyterian Church, Sutnga: Kaba jngai 96 Kilometres na ka nongbah Shillong, phi lah ban iohi ia ka jingrakhe kaba shongkun ia ka Khristmas. Ka jingitynad kam dei eh tang ka jingpynkhreh ka ïingmane ban pdiang iaka jingrakhe iaka jingkha ia u Khunlung Jisu Khrist,hynrei ka shnong baroh kawei ka wan lang hajuh ban ban pynitynnad iaka shnong da ki light bad ki decoration kiba itynnad bha. Ka shnong Moolamylliang, kumba ju leh man la u snem, ka da pyniphuh iphieng ia ka jingpynkhreh iaka Khristmas da ki Lights bad ki Decoration ki bapher bapher kaba khring ia ki paidbah na kylleng ban leit jngoh ia kane ka shnong. Ha ki snem kiba mynshwa ki nongshong shnong ha Moolamylliang ki kamai jakpoh na u dewiong hyrei mynta kane ka jaka kala kylla long kum ka jaka kaba khring tam ia ki nongjngoh kai ha ka por Christmas da ka jingshimkhia u Rangbah Shnong bad ka Dorbar Shnong baroh akwei.
Kitei ki 5 tylli ki ïingmane ki don ia la ka jinglong kaba kyrpang ha ki bad ia la ki jong ki khana jong ka jingngeit, ka riti ka dustur bad ka jingkmen. Haba wan ka sngi Khristmas kitei ki ïingmane ym tang ba ki pynleit jingmut ha kaban pynitynnad bad pynbhabriew tang da ki Lights bad ki Decoration hynrei ka jingrakhe kaba kynja mynsiem hi kaba pynlong ha kine ki ïingmane kadei ka jingpynlong ia ki jingiaseng kiba kyrpang bad ka jingbuh jingduwai jong ki riewngeit bad ka jingrwai ia ki jingrwai Khristmas kiba sngewtynnad shisha.
Ha kitei ki ïingmane kila pynkhreh bha ban pdiang naduh mysiem ia ka Khristmas ha kaba ki riewngeit ki rwai ia ki jingrwai kiba sngewtynad ha ka por shiteng synnia bad ki pynlong ruh ia ka jingiaseng kyrpang naduhka por mynstep haduh janmiet bad kiba leit sha ki ïingmane ki ioh ban mad ia ka jingrakhe iaka Khristmas da ka jingkmen, jingieid bad jingsuk.
