Shillong, Nohprah 15: U Symbud Myntri Rangbah ka Jylla Bah Prestone Tynsong ula kyntu ia ki paidbah ka jylla ba kin iai shah shipor bad ka jingmaramot ia ka Jingkieng Damsite bad ka Sorkar kan pynthikna katba lah ban lah pyndep ia kane ka jingtei hapoh ka 4 bnai.
“Ngi dang shah mynta ia ki kali kiba rit ba kin iaid na katei ka jingkieng hynrei ia kaba ngim shah, kadei ia ki kali heh bad ki kali kamai kiba heh ba kin iaid bad kumta kin hap ban iaid noh na ka surok Bypass” ong u Bah Prestone Tynsong.
U Bah Prestone ula ong, “La kumno kumno ruh ka Kompani kan shim por 3 bnai ban pyndep ia katei ka kam bad mynta kila sdang ia ka kam bad kin ialeh ban pyndep kloi hashwa ban slap. Ngi la bthah bad kin leh kloi ia ka kam bad ka sorkar kala buh ruh ia ka kynhun kaba kyrpang na ka MeECL”.
Ula ong, ka MeECL kan peit ba kane ka jingtrei kadei ban iaid shakhmat khlem sangeh bad ban pyndep ha ka por kaba la buh khnang ba kan ym pynthud ia ka iaid ka ieng jong ki paidbah, khamtam eh ia ka jingkit ia ki tiar ki tar bad ki marbam mardih kaba lah ban kham rem namar kin hap ban leit iaid kylleng kylleng ban wan sha Shillong.
Ula kyntu ia ki paidbah ba kin long kiba iai shah shipor ia kane ka jingeh ba ki iakynduh mynta.
