Shillong, Nohprah 15 : U Nongaiktien ka BJP Meghalaya Bah Mariahom Kharkrang ha ka sngi Thohdieng, ula ai khublei ia u Myntri Rangbah Duh ka Ri Narendra Modi bad Myntri ka Ministry of Road Transport & Highway Nitin Gadkari halor ka jingai ia ka mang pisa ba T.1,241 klur ha kaban pynheh ia ka surok Phulbari-Tura jong ka National Highway 127 ha Meghalaya.
Ia k surok ba mynta ha ka bynta na Phulbari-Tura jong ka National Highwau 127B yn shna pynheh noh sha ka Two-lane ka ban pynsuk ia ka leit ka wan sha Tura, District Headquarter ka West Garo Hills bad kiwei ki bynta ka Meghalaya lyngba ka NH-217 (Tura-Dalu) bad Tura-Jengjal-Rongjeng-Nongstoin-Shillong.
U Bah Kharkrang ula ong “76 snem ka jingioh laitluid bad 50 snem ka jingioh Jylla lajong, hynrei ki Sorkar kawei hadien kawei kila kyntait ban iohi ia ki jingdonkam ba kyrkieh ka Meghalaya ia ki jingtei ba kongsan. Kawei ka Sorkar hadien kawei, kila phailyndet ia ka jingdonkam ki lad pyniasoh kiba long kongsan eh ia ki paidbah bad ka khaii ka pateng jong ka Jylla sha kawei pat”.
“Ngi sngew sarong ba ngi ioh khatduh ia ka Sorkar ha Delhi kaba sngewthuh ia ka jingdonkam ba kyrkieh jong ka Jylla jong ngi bad trei shitom ban weng ia ki jingeh ba ngi don. U Myntri Rangbah Duh u dei u paralok jong ka thain Shatei Lam Mihngi naduh ka sngi ba nyngkong, shibun ki kam project kam pynroi ba u theh ha NE ki dei kiba ieng sakhi. Ka jingai ia ka song pisa ba mynta ka nang pynkhlain ia ka jingsngewthuh ba ngi don ia ka Sorkar kaba ieid ia ka Meghalaya ha Delhi. Ka Meghalaya BJP kan iai bteng ban trei ia ka kam ha kaban pynkhlain ia ki kti jong u Narendra Modi bad pynthikna ia ka jingiai bteng ka Sorkar jong u kaba ieid ia u paidbah “ ong u Bah Kharkrang.
