Nongpoh, Nohprah 14: Ka ophis u Deputy Commissioner, Ri Bhoi District lyngba ka tnad Food Civil Supplies & Consumer Affairs Department, hynne ka sngi Palei, ka la ai ïaka jingpynshai paidbah halor ki jingbam fortified (jingbam bala khleh bad ki dawai tei met) khamtam eh ia u khaw (Fortified Rice) ba ki paidbah ki artatien ban bam namar ka jingpur ki khana ba ki lah ban dei u khaw ba khleh lang bad u khaw plastic kiba la shu shna hi daki kompany.
Haba pynphriang ïaka khubor ha katei ka jingialang, ka Dr. D.B.S Mukhim Assistance Commissioner Food Safety Meghalaya ka la ai ïaka jingpynshai paidbah ba kim dei ban shu ngeit ïaki khubor kiba shukor bad kiba shu pyntieng ïaki paidbah khlem da tip ïaka jingshisha.
Ka la ong ruh, ba ngi dei barabor ban shaniah ïaki jingbam kiba la don īa u Symbol Plus F (+F) ha ka rong kaba blue kaba pynshisha ba ki la dei ki marbam kiba la khlem bad ki dawa tei met bad kiba long tikna ban bam. Ka ong ba lada phi lap ïaki marbam ki bym don ïa une u symbol Plus F, phi lah ban ujor lane wan ïa kynduh ïaki ophisar jong ka tnad ba dei peit ban pynbeit ïa kane ka kam.
Ka Kong Mukhim ka la shon bha ruh ïaka jingkren halor ka jingphriang ki khana u khaw plastic. Ka la ong ba kane ka khana ka dei kaba lamler bad kaba thmu ban ïalam bakla ïaki paidbah.
Ka la pynshai ruh ba kam shem la don ka jingpynmih ïa u khaw plastica na kino kino ki company hynrei ïa u khaw u ba la fortified lane “Fortified Rice” u dei u khaw u ba don ki jingbam kiba tei ban pynkhlaiñ ïaka bor met da kaba khleh ïaki vitamins bad Minerals ban pynioh ïaki jingdonkam kiba kongsan haka met u briew.
Ki jingbam kiba tei ïaka bor met ba la khleh ha u khaw ba la fortified ki long Ka Iron, Zinc, Folic acid, Vitamin B1, Vitamin B12 bad vitamin A.
