Gangtok, Naiwieng 17: Ka BJP Sikkim Mahila Morcha kala ujor sha ki pulit pyrshah ia u nongshong shnong ka Meghalaya halor ka jingthoh khlem akor bad pyndonkam da ki ktien khlem rain ha ka Facebook pyrshah ia ka Sikkim bad ia ka nongbah jongka-ka Gangtok.

Ka kynhun kaba la ialam da ka President ka Mahila Morcha ka Srijana Chettri kala leit aiti ia ka jingujor ha Sadar Police Station ha Gangtok ha ka sngi Baar. Ia kane ka jingujor la rekod hapoh jong ka General Diary No.18. Kaba kyrpad ban rejistar ia ka ejahar bad ban leh da kaba tyngeh pyrshah ia une briew uba la tip kyrteng kum u Arhunki Laloo, u nongniah thuk thuk uba na ka nongbah Shillong.
Katkum ka jingujor, la kynnoh ba u Laloo ula buh ha ka Facebook da kaba thoh ia ki jingthoh kiba khlem akor bad pynjah burom kaba kynthup lang ia ka kyrteng jong ka Sikkim bad Gangtok.
Ha ka jingujor la kdew ruh ba u Laloo udei uba don bynta lang bad ka Sikkim Riders Meet bad North East Riders Meet 2026.

Ka BJP Mahila Morcha kala kynnoh ba katei ka jingthoh khlem akor kala pynjah burom ia ka jinglong tynrai, ia ka jingdon jingem kiba naduh hyndai hynthai bad ka jingsngewsarong halor ka kolshor jong ka Sikkim. Kila ong ba katei ka jingkynthoh kala long shaba palat pud ban ia ka biria bad ka long kaba niewpoh ia ki paitbah jong ka jylla.
Kane ka kynhun kala ong, ba ka Sikkim ka pdiang sngewbha ia ki nongwankai, nongjngohkai bad ki nongniah thuk thuk da ka jingsngewtynnad. Hynrei ia kane ka jingpdiang sngewbha ym dei pat ban sngewthuh bakla ba kadei ka jingtlot.
Ka Morcha kala pynpaw ba dei ban burom bad niewkor ia ka jinglong tynrai jong ka Sikkim. Kala kyntu ia ki pulit ba shimkhia mardor bad ban sdang ia ki kam da kaba iaid katkum ki aiñ ki kanun pyrshah ia une u briew.
La kynnoh ruh ba katei ka jingthoh kala pynbitar ia kiba bun ki briew, kiba la sngewkhia ba katei ka jingthoh kala ktah ia ka jinglong tynrai ka Jylla bad ia ka jingsngew jong ki paitbah.


