“Ngim pat pdiang ia ka lynti rel kat bym pat ioh ia ka ILP” ong ka KSU

Shillong, Nohprah 07: Ka Khasi Students’ Union (KSU) hynne ka sngi Balang kala iengskhem ba kan ym shah ban pyntreikam iaka projek rel katba ka sorkar pdeng ka dang iai kuman ban pyntreikam ia ka Inner Line Permit (ILP) ha Meghalaya.

U General Secretary ka KSU u Donald V Thabah, ula ong ba ka seng kam pyrshah ban pyntreikam ia ka lynti rel lada ki don lypa ki atiar kiba lah ban tehlakam ia ka jingwan rung kyrthep ki mynder ban iada ia ki trai ri trai muluk ba kin ym kylla ki rit paid ha la ka jongka jylla.

Halor ka jingthmu ka sorkar ban pyntreikam ia ka rel kit mar ha rilum Khasi-Jaintia, u samla Donald Thabah ula ong, “Ngi lah iohi na ka por sha ka por, u Myntri Rangbah bad kiwei pat ki Myntri Sorkar kila kam ba ka jingwanrah bad jingpyntreikam ia ka rel kit mar, kan ai jingmyntoi ia ki paidbah khamtam ia ki nongrep hynrei kila pulom pat ha kaban peit ia ka jingma ba shisien ba la don ka lynti rel yn sa sdang sa ka iaid sa ka rel kit briew”.

“Khlem ka ILP ne kiwei kiwei ki aiñ kiban iakhun pyrshah ia ka jingrung kyrthep ki mynder, ka Meghalaya, kaba don paid tang khyndiat ngut eh ki riewlum, kam lah ban pdiang ia ki rel kit mar ne rel kit briew” ula ong bad ka kyntu ia ka sorkar jylla ba kadei ban shimkhia mardor bad ka sorkar pdeng ban pyntreikam noh mardor iaka ILP ha ka jylla.

U General Secretary ka KSU ula ong, ba ki rel kit mar ki lah ban wanrah jingmyntoi ia ki paidbah ka jylla ha kaban pynduna ia ka dor jongki marbam mardih hynrei kam dei pat ban buh ha ka jingma ia jingdon jong ki trai riewlum ban shah tyllep ha ki mynder.

Ula pynkynmaw ba ka jingdawa ia ka ILP ha Meghalaya kala sdang naduh u snem 1987 bad dei tang ha u snem 2019 ba ka iingdorbar thawaiñ ka jylla kala mynjur iaka Resolution halor kane ka mat. Hynrei kane ka Resolution haduh mynta ka dang sahkut bad ka sorkar pdeng ban ai iaka jingmynjur.

“Ka long kaba lyngngoh ba ka sorkar pdeng ka sngap jar halor kane ka jingdawa haduh mynta, watla bun tylli ki dorkhas la dep ban aiti ban dawa pyntreikam noh mardor ia ka ILP ha Meghalaya,” ula ong.