“Ba kynnoh leh Politics ka BJP halor ka jingkhynra ia ka Farmhouse u Nongialam”
Shillong, Naitung 25 : Ka Assembly Committee on Women Empowerment (CoWE) hynne ka sngi nyngkong, kala ban jur ia ka jingdon kam ban nym pyniakhleh ia ka kam sain pyrthei (Politics) bad ki kam bymman haba kut jingmut ruh ba ka Committee kan wad ia ka jingshisha ia kaei kaba jia ia ki 5 ngut ki Khynnah kiba ioh ban pyllait da ki Pulit n aka farmhouse shimet jong u Nongialam ka BJP ha R-lum Garo.
“Ka Assembly Committee kan wad ia ka jingshisha ia kaei kaba jia ia kine ki Khynnah ba ioh pyllait ki Pulit na ka farmhouse u Nongialam ka BJP bad ngi ban jur ruh ba ym dei ban pyniakhleh ia ka kam sain pyrthei bad ki kam bymman” ong I Kong Ampareen Lyngdoh, Chairperson ka CoWE haba iakren bad ki nongthoh khubor.
Kane ka jingkynthoh jong I kala mih hadien ba u Vice President ka BJP bad MDC ka Tura u Bernard N Marak ula kyntait ia ka jingkynnoh pyniaid kam awria ha ka farm jong u ka Rimpu Bagan haba kynnoh ruh ba ka jingkhynra jong ki Pulit ka dei ka jingsuhbuit namar ka BJP kala nang khlain bor ha Ri-lum Garo.
U Bernard ula kam ruh ba u khlem phetrieh satia na ka kti jong ka ain hynrei ula rieh namar ka jingsheptieng iala ka jing im namar u Myntri Rangbah ka Jylla ula ai ia ka hukum ban siat iap beit beit ia u.
Ki Pulit ka West Garo Hills kila kam ba kila ioh ban kyndang ia ki kam khaii met ha kane ka farmhouse jong une u MDC ka BJP, kaba lam sha ka jingiohkem ia 73 ngut ki briew bad ioh pyllait ia 5 ngut ki Khynnah nalor ka jingioh kurup ia bun bah ka kyiad bad ki condom.
Ia kane ka jingjia la iakren ruh ha ka jingialang jong ka Committee on Women Empowerment ba long hynne ka sngi.
“Ngi la iakren sani bha halor ka jinglong jingman jong kine ki 5 ngut ki Khynnah ha ka jingkhynra ki Pulit ha Tura. Ngi la kyntu ia ka Tnad Social Welfare ba kin wan ai jingtip biang sha ngi ha ka 8 tarik Nailar halor ka jinglong jingman jong ki Khynnah” ong I kong Ampareen.
Halor ki jingiakynnoh markylliang halor kane ka jingjia, ine u Chairperson ka Committee ila ong ‘Wat pynbakla ia ka kam sain pyrthei bad ki kam bymman kiba la jia. Pyniaphiah la ka jong ia kine. Phi lah ban don ka thma sain pyrthei hapdeng jong phi hynrei phim don bynta ban pyndonkam ha kano kano ka rukom ia ki Khynnah bad ki Kynthei”.
Haba pynpaw ba ka Committee kan sa wad ia ka jingshisha, I Kong Ampareen ila ong “Ngin sa lah ban pyniaphiah ia ka jingshisha na kaei kaba shu iamut. Ngam lah ban sngewthuh balei ba ki briew ki iakynnoh mar kylliang hynrei nga tip tang kawei ba phim lah ban rieh lane ban buhrieh ia ka jingjia ba ki 5 ngut ki Khynnah kila shah setkut, pyniaid ha ki kam awria”.
I Kong Ampareen I pyntip ruh ba ka Committee kala bthah ia u DIG ka Eastern Range ba un tohkit ia ka jinglong jingman jong kine ki 5 ngut ki Khynnah ba ioh pyllait na kane ka jaka ba kynnoh ktem awria.
“Ngin sa ioh shuh shuh ia ki jingtip ha ka 8 tarik Nailar” ong I Kong Ampareen haba kyntait ban kynthoh tam halor kane ka jingjia.
