Shillong, Nohprah 06 : U Symbud Myntri Rangbah ka Jylla Bah Prestone Tynsong ha ka sngi Balang, ula bthah ia ki kompani ba pyntrei ia ki project bapher bapher ha Jylla ba kin pyntip sha ki bor pyniaid District lada don kano kano ka jingwan pynthut jong ki Sengbhalang ia ka kam ba ki trei.
U Bah Prestone ula kynthoh ia kane halor ka hukum ba dang shen jong ka Iingkashari Meghalaya High Court, ba bthah ban tehlakam ia ka jingtuklar jong ki Sengbhalang ha ka ban pynthikna ia ka jingiaid beit ka kam ban pyndep ia ka surok Shillong-Dawki bad kiwei kiwei ki project kiba mad ia kijuh ki jingeh.
“Nga la kren da kaba shai kdar ba kino kino ki ishu ne jingpynthut ne jingkah lynti ba phi (kompani) iakynduh, sngewbha pyntip mar mar sha ki bor District, ngin pynthikna ba kum kine ki jingpynthut kim dei ban don lane ban jia namar kine ki project ki dei na ka bynta ka bha ka miat jong ki paidbah ha ka Jylla” ong u Bah Prestone.
U pyntip ba ka Sorkar kala dep bthah ruh ia ki bor District ba kin pynthikna ia ka jingshngain jong ki nongbylla kiba pyntrei ia ki project ba kongsan hapoh ka Jylla.
“Nga la dep ai ka jingbthah sha baroh ki bor District, la ka mih kano kano ka jingjia lane kano kano ka jingpynthut ha ki jaka ba pyntrei ia ki project, sngewbha pynthikna ia ka jingshngain bad jingiada ia ki nongbylla bad ban nym ailad iano iano ruh ban ktah ia ki” ong u Bah Prestone.
Haba kdew ia ka The Meghalaya Identification, Registration (Safety & Security) of Migrant Workers Act, 2020, u Symbud Myntri Rangbah ula ong ba ia ki kompani bad contractor ruh la kyrpad ba kin pynthikna ba baroh ki nongbylla ki dei ban ioh ia ka Labour Licence na ka Tnad Labour jong ka Jylla.
