Shillong, Naitung 25: U Nongialam ka NPP bad Symbud Myntri Rangbah ka Jylla Bah Prestone Tynsong hynne ka sngi nyngkong, ula ong ba ka jingkhynra jong ki Pulit ia ka farmhouse u MDC ka BJP na Tura Bernard N Marak, kaba sei madan ia ka jingpyn iaid kam awria ha kane ka jaka, kan ym don jingktah satia ia ka Sorkar MDA kaba donlang bad ka BJP.
“Kam pher la phi iadonlang ne ym donlang ha ka Sorkar, ngi dei ban ailad ia ka Ain ba kan iaid hala ka jong ka lynti. Ka ain te ka ain hi. Hooid ka BJP ka iadonlang ha ka Sorkar, hynrei khlem da khein party, ngim lah ban shu sngap jar ia kine ki jingjia kibym sngewtynnad satia” ula ong.
Une u National Vice President ka NPP ula ong “Ki Pulit kila hiar khynra hadien ka jingioh lum ia ki sakhi satar kiba khlain. Lada ngi donkam ban pynlong ia ka jingkhynra lane donkam ban hap tohkit shuh shuh, ka dei mo ia ngi ba ngin pynsangeh noh tang namar ba ka (BJP) ka iadonlang ha ka Sorkar”.
Haba kylli, u Bah Prestone ula ong “La ka don ka jingpynbor ne jingbym pynbor, ka jingtohkit kan iaid beit shakhmat bad ai ba ka ain kan iaid hala ka jong ka lynti”.
Halor ka jingmih ka jingdawa tohkit da ka kynhun ba laitluid ia kaei kaba jia ha kane ka farmhouse u MDC ka BJP, u Bah Prestone ula ong “Ka dang kloi palat ban ong eiei ia kane namar kane ka kam ka dang don hapoh ka jingtohkit jong ki Pulit”.
“Hynrei lada donkam ia ka jingtohkit, ka Sorkar kan sa thung mardor ia ka jingtohkit ba laitluid” ula ong.
