Shillong, Nohprah 01: U MLA ka South Shillong Constituency u Bah Sanbor Shullai hynne ka sngi Thohdieng ula lum ia ka jingialang ha State Convention Centre, Shillong ban iatai sani halor ki kam pynroi kiba iadei bad ka umbam umdih bad ki surok, kiba la pyntreikam bad kiban pyntreikam hapoh ki shong kiba hap hapoh jongka South Shillong Constituency.
Haba iakren bad ki nongthoh khubor hadien bala wai ka jingialang, u Bah Sanbor Shullai ula iathuh, ba ha kane ka jingialang kaba ula lum, la iakren halor ka jingpyntreikam ia ki kam pynroi ha ka Constituency na ka bynta ka bit ka biang jong u paidbah.
“Ngi la iakren sani halor ka skhim Atal Mission for Rejuvenation and Urban Transformation (AMRUT) kaba la mang naduh u snem 2001-2002 bad nalor kane ka skhim, ngi la ioh ruh ia ki skhim na ka sorkar jylla lyngba ka tnad PHE bad SMB ban pynbiang ia ka umbam umdih ia ki paidbah ha ka thaiñ Laban, Lumparing, Kenches Trace bad Madan Laban” ong u Bah Sanbor.
Ula ong, ba kane kadei ka skhim kaba thymmai bad kadei ka Additional Water Supply Scheme ia ka tain namar ka jingbun ki nongshong shnong, ki jaka sah, ki Guest House bad kiwei kiwei bad ka jingdonkam iaka um kala jur bha.
U Bah Sanbor ula iathuh ba da ka jingiatreilang ka tnad PHE bad SMB la ioh iaka bhah tyngka kaba T.7.74 Klur tam ban tan iaka um na ka Wah Jalanoh bad ka Umsohphienam bad kiba bun ki bynta la dep ban shna ia ki top um bad la dep ruh ban pyniaid ia ki pipe um bad kaba sah ka long sa tang ban pynpoi ia ka um lyngba ka Distribution Line.
Ula ong ruh ba ka don sa kawei ka skhim ban shim ia ka um na ka Wahrisa hynrei ha ki shisnem shiteng, ka Tnad Forest kam shym la ai jingbit ban shna iaka top um ha ka jaka jong ka, hynrei mynta kala ai jingbit ban tei iaka top um na ka bynta ban pynpoi um sha Lower Lumparing, Lumdorbar Lumsohphoh bad ka tnad PHE kala dep siew ruh T.3 Lak sha ka tnad Forest.
U MLA ula khmih lynti ba ki kam ki jam kin sa sdang noh mardor bad ula kyrpad ia ki heh ophisar ba kin iatrei ryngkat bad ki Dorbar Shnong ban pyniaid shakhmat ia ki kam ki jam khamtam ha kane ka aiom tlang kaban long ka jingmyntoi ia ki paid nongshong shnong.
Ha kaba iadei bad ki surok kiba don ha ka Constituency, u Bah Sanbor ula pyntip ba ula pynioh iaka bhah tyngka kaba kot T.34 Klur ban shna ia ka surok ha ka shnong Lumparing, Lower Lumparing. Laban, Kenches Trace, Rilbong.
Ula ong, ka jingialang la kyntu ruh ia ki Kontraktor ba kidei ban pynsted ia ka jingtrei ha kaban shna ia ki surok bad ban pyndep noh ia ka kam hashwa ban slap, ban pynsuk ia ka leit ka wan jong ki paidbah.
Ha katei ka jingialang la wan ban iashimbynta da ki heh ophisar jong ka tnad Shillong Municipal Board, ka tnad Urban Affairs, PHE, PWD bad ki Nongialam na ki Dorbar Shnong bapher jong ka South Shillong Constituency
