Jowai, Naiwieng 30: Ka Raij Chyrmang hapoh jongka Elaka Jowai hynne ka sngi Palei kala pynlong ia ka jinglehniam ‘Ku Tyngkong’ ban ai ka jingithuh kaba shi rta ia u Pator jong ka Elaka Jowai u Bah Raymond Nartiang, ha ka jingialang kaba la long ha Yung Langdoh kaba don ha ka shnong Chyrmang.
Kane ka jingleh niam leh rukom kadei kaba shisien ha ka jingim jong u Pator.
U Pator udei uba bat ia ka kyrdan kaba long hapoh jong u Dolloi ha kylleng ki Elaka jong ka rilum Jaiñtia khamtam eh naka bynta kito ki riewngeit jong ka Niamtre bad ka kamram ka jongu kam dei eh tang ha kaba iadei bad ka niam ka rukom hynrei ban long ruh kum u Ksiang uban pynbeit ia kino kino ki jingiasngewthuh bakla hapdeng ki Raij kiba don hapoh jong ka Elaka.
Dang step, u Dolloi ka Elaka Jowai u Puramon Kynjing, u Pator bad ki nongkitkam ka Seiñraij Jowai kila mih ban leit sha ka Wah Myntdu ha kaba la ialam bad rah ia u Pator sha shilliang ka Wah hashwa ban ialam ia u sha Yung Langdoh.
Ynda la poi ha Yung Langdoh, la pynlong ia ka nguh ka dem bad ka jingbamsmai kaba mar kylliang hapdeng u Langdoh ka Raij Chyrmang bad u Pator naka bynta ban batskhem bad ban iada iaki khappud jong ka Raij Chyrmang bad ban burom ia kiba shong basah hapoh jong ka Raij bad kumta ter ter.
