Shillong, Naiwieng 30: Ka kyrtong iakhun MP ka NPP na Shillong bad Myntri Sorkar Kong Ampareen Lyngdoh, ha ka sngi Palei jong ka taiew, kala byrthen ban ‘pynkhihwin’ ha Delhi ha kaban pynbor ia ka Sorkar Pdeng ba kan shim rai noh halor ka jingdawa pyntrei kam ia ka Inner Line Permit ha Jylla, lada ka shah jied ban long ka MP ha ka elekshon Lok Sabha ban long ha u snem 2024.
Ka Kong Ampareen haba iakren bad ki nongthoh khubor kaba ong ba ki paidbah kim dei ban klet ia ka jingshisha ba baroh 60 ngut ki MLA kila buh shadien ia ka jingsngew party bad iasoi lang ia ka Resolution bala phah sha ka Sorkar India ba kan pyntreikam ia ka ILP ha Meghalaya.
Hynrei kala ong pat ba ka long kaba sngewsih, ba dei tang ka Sorkar Jylla, kaba buddien ia kane ka kam ha ryngkat bad ka MP ka Tura ka Agatha K Sangma.
“Mynta, ngin iasnohkti lang bad ka Sorkar, bad ryngkat ka MP ka Tura bad ma nga bad ngeit ia nga, ngin pynkhihwin ha Delhi. Ka Sorkar Pdeng kan hap ban shim rai (halor ka resolution bala mynjur da ka Iingdorbar Thaw Ain ka Jylla ha u snem 2019)” ong ka Kong Ampareen haba bynrap “Nga lah ban ong ia phi kawei, ngin ym kren ia kane tang ha Iingdorbar Parliament hynrei ngin leh ia kano kano ka kam ka ban khring ia ka jingmut jingpyrkhat halor kane ka mat”.
“Ngi la dep shong iakren halor ka miej. Nga la pule lut ia baroh ki jingiakren ba buddien bad ka jingiakren kaba ka Sorkar MDA-I kala iakren bad ki kynhun bapher bapher. Nga la pule bniah bha ia ki kaiphod. Nga tip ia kaei kaba la kren ha katei ka por. Ngin iai buddien halor ka jingdawa ILP da kajuh ka mynsiem. Ngim lah ban iaid lait na kaei kaba la iakren bad ki kynhun bapher bapher” kala ong.
Kane ka MLA bala san samoi na East Shillong kala ong ruh ba ka Sorkar MDA-I ba ialam da ka NPP kala dep pynbna ia ka jingtreikam jong ka Meghalaya Residents, Safety and Security Act (MRSSA) ha kaban tehlakam ia ka jingrung kyrthep ki bar jylla bad mynder ri shapoh ka Jylla.
“Ki don kiei kiei kiba la iakren halor ka MRSSA ha ka Sorkar ha ka Sorkar barim hynrei ka Sorkar MDA-I kala jam sahkhmat ban khmih bha ia ka jingtreikam jong ka MRSSA da kawei pat ka lynti” kala ong haba kular “Ngan ieng beit halor kaei kaba ka Sorkar ka ong. Ngan nym iaid lait na kaei kaba la Sorkar kala de pong bad kular sha ki Sengbhalang”.
