Shillong, Naiwieng 30: U Nongrwai ba pawnam ka America Sean Kingston, ula pynbna paidbah ba un wan pynlynguh ia ka Nongbah Shillong da ki jingrwai ba pawnam ha ka miet ap Snem Thymmai ha madan Polo.
U Sean Kingston ula pyllait paidbah ia kane ka jingpynbna kaba la saphriang ha ki rynsan social media, ba pyntip ba un wan ban tem bad rwai ha ka miet 31 tarik Nohprah ha Shillong, ka Music Capital jong ka Ri India.
Khlem pep, ka Nongbah Shillong kala ap khmih lynti bha ia ka jingwan jong une u Nongrwai ba pawnam ka America uba la pynshoh jadu da ki jingrwai ba shongshit jong u ba kynthup ia ka jingrwai “Beautiful Girl’, ‘Fire Burning’, ‘Eenie Meenie’ bad kiwei kiwei.
Kane ka jingwan u Sean Kingston ka dei shibynta jong ka Northeast India Tour 2023.
Shuwa ka jingwan sha Shillong, une u Nongrwai un leit shuwa sha Dimapur, Nagaland bad un kiew rynsan ban rwai ha ka 28 tarik Nohprah ha madan Agri Expo Ground. Hadien kane, yn leit sha Aizawl, Mizoram ha ka 29 tarik Nohprah ban rwai ha A.R Ground.
