Shillong, Naiwieng 29 : Ka Hynniewtrep Youth Council (HYC) ha ka sngi Balang kala dawa ia ka Sorkar Jylla ban weng noh mardor ia ka shithi bala pynmih da ka Ophisar ka Tnad Social Welfare, kaba pynman bakla ia ka KHAD (Khasi Social Custom of Lineage) Act, 1997.
Haba iakren bad ki nongthoh khubor hadien ka jingialang bad u Myntri ka Tnad Social Welfare Bah Paul Lyngdoh, u President ka HYC Roy Kupar Synrem ula ong “Ngi kyrpad ia phi ban sngewbha pynmih ia ka jingbthah ba donkam ha kaban weng noh ia ka shithi bala kdew haneng”.
Ula ong baka shithi ka Tnad Social Welfare kala ong “Namar kata, la ban ong ba ka Lineage Act, 1997 kam shym la khang ban ia ST certificate ia ki nongaplai kiba shim ia ka jait la ka dei na u Kpa ne ka Kmie bad ka jingshim jait sha u Kpa da ki kurim bym dei ki Khasi (bar jylla) ruh la shah”.
“Ka HYC kala thoh sha ka Khasi Hills Autonomous District Council (KHADC), Shillong, ba pan jingpynshai ba hato ka ain bala thaw da ka KHADC bala tip kum ka KHAD (Khasi Social Custom of Lineage) Act, 1997 ka shah ban ai ST” ula ong.
Ula ong ba haba pynshong nongrim ia ka jingujor jong ka Registration Authority, KHADC, Shillong lyngba ka shithi No. DC.II/RA/24/2023/2 ba 8 tarik Jymmang, 2023, la thoh sha u Under Secretary ka Sorkar Meghalaya jong ka Tnad Social Welfare, ba ai ia ki jingpynshai halor kane ka kam bad kyntu ruh ia ki bor khmih ba kim dei ban ai ia kano kano ka ST certificate ba iaid pyrshah ia ka KHAD (KHasi Social Custom of Lineage) Act, 1997 bad ka Rule bala thaw na kane.
“Ka shithi jong u Under Secretary ka Tnad Social Welfare ka long kaba beain bha bad kaba iaid pyrshah ia ka riti ka dustur bad kumjuh ruh ia ka ain kaba don kata ka KHAD (Khasi Social Custom of Lineage) Act, 1997 bad ka rule bala thaw n aka. Kumta dei ban weng noh mardor ia kane ka shithi” ula dawa.
