Shillong, Naiwieng 29: Ka All Meghalaya Minorities Students Union (AMMSU) hynne ka sngi kala thoh sha u Director General of Police (DGP) ka Jylla ban kyrpad ba dei ban buh noh daka Fire Service Station hapoh ka shnong Rajabla kaba hap hapoh ka Rajabala Police Station ka West Garo Hills.
Haka shithi sha u DGP ka Jylla, ka AMMSU ka pynpaw ba ki jingjia pluh ding ki ju wan jia naka por shaka por ha Rajabala kaba la wanrah ka jingduh nong bha iaki ba buh dukan bad iaki paidbah nongshongshnong.
Ka shithi ka pyntip ruh ba ka Service Station kaba iajan eh bad ka Rajabala ka don ha Phulbari, kaba jngai haduh 20 Km bad kane ka buh jingeh iaki paidbah ban iakhun ia ka ding lada jia ba don kano kano ka jingpluh ding.
“Ym tang ka shnong Rajabala hynrei kiwei ki shnong marjan ruh ki mad shibun ki jingeh lada don ka jingjia pluh ding namar ka jingjngai palat ka Fire Service Station namar kane ngi kyntu ban buh noh daka Fire Service Station ha Rajabla naka bynta ban iakhun pyrshah ki jingjia pluh ding” la ong ka shithi jong ka AMMSU sha u DGP.
