Shillong, Naiwieng 28: U Myntri Rangbah ka Jylla Conrad K Sangma ha ka sngi Ba-ar, ula pynbna ia ka shnong Chigitchakgre kaba hap hapoh ka Gambegre C&RD Block, West Garo Hills, kum ka “Shnong ki Ngap” ne “Bee Village”.
Ula ong ba kane ka shnong kala ioh ia baroh ki jingkyrshan ban thep ia ka ngap ha ki bitor, pyninam ia ki mar bad ban leh ia shibun ki kam kiban kyntiew ia ka shnong kum ka “Shnong ki Ngap” ka ban khring ia ki nongshang sawari.
Ula ong ba hapoh ka Apiculture Mission 2.0, ka Sorkar Jylla kala kyntiew ia ki kam ban pynmih bad sain ia ka ngap. Ula ong ba da ka jingpynbna kum ka shnong ki ngap, kan nang plie lad ia ki paidbah bad ki nongshang sawari ba kin wan iuhkjat hapoh ka Jylla, nalor ka jingplie lynti ia kiwei pat ki kam kiban kyntiew ia ka roi ka par bad ka ioh ka kot.
U Myntri Rangbah ula pynbna ruh ban ai song jingiarap ba T.10 lak naka CMSDF sha ka Shnong ba kan nang pynkhlain ia ka jingpynmih ngap hapoh ka Shnong.
Ha kajuh ka por, u Myntri Rangbah ula kyntu ia ki paidbah ba kin shim kabu ia ka CM-Elevate, ka skhim jong ka Sorkar Jylla kaba kyrshan ia ka jingsengkam lajong.
U MDC ka Gambegre Rakesh A Sangma bad Deputy Commissioner Jagdish Chelani ruh kila iadonlang ha kane ka prokram.
U Myntri Rangbah ula iathir bad iasyllok ia shibun kiei kiei bad ki nongshongshnong ha kane ka prokram.
