Tripura: Iakynduh u Advisor ka MHA ia u CM, lah ban iakren mynta bad ka Tipra Motha

Agartala, Naiwieng 28: Shuwa ka jingiakren ba kongsan bad ka Liang Pyrshah Tipra Motha lem bad kiwei kiwei ki kynhun halor ki jingdawa bad ki jingeh ba ki iakynduh, u Advisor ka Ministry of Home Affairs (MHA) AK Mishra ula poi ha Agartala bad iakynduh ia u Myntri Rangbah ka Jylla Manik Saha ha ka sngi Nyngkong.

Kat kum ki khubor, ka jingiakren halor ka jingshah leh bein ki riewlum bad ki jingdawa ban ai ia ka Greater Tripraland State hapoh ka Tripura, la khmih lynti ba kan long mynta ka sngi Ba-ar.

U CM Saha ula ong ba ka Sorkar ka kyrmen ba kan don noh ka jingia imsuk imsain lang noh hapdeng ki paid riewlum bad ki bar jylla hapoh ka Jylla hadien habud. “Ka roi ka par ka dei ka mat ba hakhmat eh jong ngi. Ngi kwah ba ki paid riewlum bad ki bar jylla kin ia imsuk imsain para maki hangne. Lada mih kaei kaei, ngin sa shong iakren bad iapynbeit iaki” ula ong.

U Saha ula ong ruh ba u Mishra ula mynjur ban iakynduh ia ki Nongialam jong ki paid riewlum lane ki Samajpatis, ka tribal frontal wing jong ki seng sain pyrthei ba kynthup ia ka BJP Janatati Morcha bad ki Seng samla jong ki paid riewlum.

Ka khubor ba iajan bad ka TIRA Motha, kaba la dawa ban pynbeit noh ia ka jingeh ki paid riewlum hapoh ka Riti Synshar, kala ong ba ka kynhun ba 15 ngut ki dkhot bala ialam da u Nongseng ka party Pradyot Kishore Debbarma, kin iakynduh ia une u Advisor ka MHA.