Shillong, Naiwieng 27: Ka Khun Hynniewtrep National Awakening Movement (KHNAM) hynne ka sngi Nyngkong, kala kyntu ia kiwei ki seng saiñ pyrthei ba kidei ban mih shakhmat ban kren eiei halor ka Reservation Policy ym ban shu kynjah beit noh halor kane ka mat.
Ia katei la kren da u General Secretary ka KHNAM u Bah James MA Neng, hadien ka jingwan ai ia ka dorkhas ha u Chief Secretary ka jylla u Bah DP Wahlang.
“Ka jingwan ka jong ngi kam dei tang ka jingkyrsiew ia ka sorkar jylla hynrei wat ia kiwei ruh ki seng saiñ pyrthei ba kin kren eiei halor kane ka Reservation Policy kumba ki lah iakhih bad kren na ka por sha ka por bad kam dei ban shu kynjah beit noh kumne bad ngi khmih lynti ba kan kyrsiew ia ki, ba kin wan shakmat ban kren eiei halor ka Reservation Policy khamtam kito kiba don ha ka sorkar namar ki don bha ia ka lad ban pynbor ia ka sorkar.” ong u Bah James.
“Ngi kyntu ia kiwei pat ki seng saiñ pyrthei ba kin shimkhia lem ia kane ka kam khnang ba kane ka kam kan long kaba jop kumba ngi lah khmih lynti ha ki jingialang kiba la dep” ong u General Secretary ka KHNAM.
Haba iakren bad ki nongthoh khubor, u Bah James ula ong, ba ka KHNAM kala buddien ha kaba iadei bad ka jingthung ia ka Expert Committee kaba khmih bad bishar bniah ia ka jingthmu ban pynkylla ne pynbeit thymmai iaka Reservation Policy jong ka jylla.
“Ka Expert Commitee ka lah dep ban shong ia ka jingialang kaba nyngkong ha ka 23 tarik u Naiwieng bad ha ka 6 tarik u Nohprah kan shong ia ka jingialang kaba ar lyngba ka Online Video Conferencing bad ia ka jingialang kaba lai yn pynlong ha nongbah Shillong” ula ong.
Ula ong, ba ka KHNAM ynda kala leit ban iashimbynta ha ka jingialang jong baroh ki seng saiñ pyrthei, kan sa pan jingshai halor ka jingbuh ia ka ophis treikam jong katei ka Committee ha Delhi bad kumjuh ruh ha kaba iadei bad ka jingbun jong ka jingpynlut ban siew ia ki jingdonkam baroh jong katei ka committee.
U Nongialam ka KHNAM ula pynpaw ruh ia ka jingkhmih lynti ba ha u snem ban wan, ka Expert Committee kan pynmih eiei noh bad na ka liang u Chief Secretary ula pyntip ba kane ka Committee kan sa khot biang ia baroh ban iatai sani halor ka mat kaba iadei bad ka Reservation Policy.
 hynne ka sngi Nyngkong, kala kyntu ia kiwei ki seng saiñ pyrthei ba kidei ban mih shakhmat ban kren eiei halor ka Reservation Policy ym ban shu kynjah beit noh halor kane ka mat.){kind=link}