Shillong, Naiwieng 26: U Badonkupar Synnah u la pynshoh biej ia ki paidbah nongkyrshan, hadien ba ula lah ban khur ia ka jingjop ha ka kyrdan iakura jong ka Light Welterweight 60-63.5kg ha ka sngi kaba ar jong ka 7th Elite Men’s National Boxing Championship ha ka sngi u Blei ha SAI Indoor Hall, Shillong.
Kane ka lympung iakura kaban kut ha ka 1 tarik u Nohprah, la pynlong da ka Meghalaya Boxing Association ha ryngkat ka Boxing Federation of India bad la kyrshan da ka tnat Sports and Youth Affairs jong ka Sorkar Jylla.
Ha kane ka sngi, u Badonkupar Synnah uba la iakhun pyrshah ia u Roopesh Shukla uba na Madhya Pradesh, u la khur ia ka jingjop hadien ba u la tam point bad ban pynhun ia ki paidbah nongkyrshan kiba la wan ban sakhi ia kane ka jingiakura.
U Badon ula long uba nyngkong eh na ki nongiakura ka Jylla ban jam sha kawei pat ka wat jingiakhun.
Ha kane ka sngi kaba ar, la lah ban pynlong haduh 78 tylli ki jingiakura bad ki rangiakura na kylleng ka ri ki la khmih lynti ban ialehkai bha na ka bynta ban jam sha kawei pat ka wat jingiakhun bad ruh ban khur takma.
U rangiakura uba la khur ia ka takma ksiar ha ka South Asian Games u Sachin na Services ula iakhun pyrshah ia u Vishal Kumar uba na Punjab ha ka 54-57kg Featherweight bad u Sachin ula lah ban khur ia ka jingjop da kaba tam point.
U rangiakura uba la khur ia ka takma rupa ha ka Asian Championship 2019 u Ashish Kumar na Himachal Pradesh ula iakhun pyrshah ia u rangiakura na Manipur u Kingson ha ka Featherweight. Hapdeng kane ka jingiakhun kaba iakhaid bha, hynrei u Kumar ula lah ban khur ia ka jingjop.
Kiwei pat ki rangiakura ka Jylla Meghalaya, ba kynthup ia u Kordor Marwein ha ka Lightweight 57-60kg, ula shah rem ha u Aditya Nagar na Uttar Pradesh hadien ba u rephri ula hap ban pynsangeh noh ia ka jingiakhun ha ka wat kaba nyngkong. Kane ka jingpynsangeh ka la wan hadien ba u Kordor ula shah kura tyngeh ha utei u rangiakura uba na UP.
Ha ka 48-51kg Flyweight, u Khrawbok Marwein ula iakhun pyrshah ia u rangiakura uba na Bihar u Shiv Kant. Watla u la shah kura bad khyllem ha madan, hynrei ula pyrshang katba lah ban iakhun tyngeh bad ha kaba kut u la shah rem noh hadien ba u la shah tam point ha utei u rangiakura uba na Bihar.
