Shillong, Naiwieng 27 : Ka ding kaba klang bha, kala bam duh ia kawei ka Iing armala hynne ka step sngi Nyngkong hapoh ka shnong Nohsngithiang, Mawprem.
Kane ka Iing kaba pluh ka dei kaba shu ker da ki lyntang bad la iathuh ba mynshwa ka dei ka karkhana ba shna ia ki synduk metiap briew.
Kat kum ka khubor Pulit, kane ka jingjia kala jia ha ka por 5:30 baje eiei bad ka ding ruh kala sdang na ka mala kaba ar ba don kane ka karkhana, kaba la shu ieh bad bym don ba sah briew.
Ki Pulit ki suba jur ba ka phylliah ding ka lah ban mih na ka jingthut jong ka bording elektrik.
Ka jingtohkit mynta kala iaid shakhmat ban lap bad pynthikna ia ki daw tynrai jong kane ka jingjia.
