Shillong, Naiwieng 24: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem hynne ka sngi Thohdieng ula pyntip baka Council kala phah Legal Notice sha u Nongialam ka Sein Raij Jowai Bah Chandalok Dkhar halor ka jingkren be-ain pyrshah iaki District Council bad iaki MDC.
Haba kren sha ki lad pathai khubor u bah Pyniaid ula iathuh ba u Bah Chandalok Dkhar u dei u Chairman ka Arts Committee jong ka Sein Raij Jowai haba kynnoh ba une u Rangbah haka sngi rakhe Seng Kut Snem ka Seng Khasi Kmie, ula ong ba dei ban pynduh noh iaki District Council namar kim lah ban pynneh iaka riti dustur.
U Bah Pyniaid ula ong “Ha Meghalaya ki don 3 tylli ki District Council, u thew ia kano ka District Council ka bym lah ban tip hynrei ban shu thew kyllum lang ia baroh ki District Council ba kim treikam, ka long kaei kaei kaba bakla bad kaba ngim lah ban pdiang”.
“Namar kata nga kyntu ia une u Rangbah ba udei ban pynshai, ba halor kane ka nongrim phi kren ban kynthup lang ia ngi baroh. Phi dei ban pynthikna, kiei kita ki District Council kiba pynduh iaka riti dustur bad kino kita ki District Council ki bym bit bym biang” la ong u Bah Pyniaid.
U Bah Pyniaid ula ong ba lada kim don ki District Council, shaei ki nongsynshar, ki Syiem, ki Doloi, shaei ki nong synshar raid, ki rangbah shnong, ki doloi kin poi.
“Peit mynta ka Hima Khyriem bad Hima Mylliem, kiba dang bat iaka niam ka rukom, lada ym don ka District Council 70 snem mynshwa kila duh noh namar ngim ioh iaka ain jingiada ba kyrpang haka riti synshar ka Ri India ban pynneh” ula ong.
U CEM ula pynrem jur ruh ia u Bah Chandalok Dkhar, uba la kynnoh ba ki MDC kidei kiba bamsap suda bad ki wan haki District Council tang ban bamsap.
“Ia kane hi ngim lah ban pdiang. Une u rangbah u kren iano ruh ngim tip, u shu kynnoh lut ia baroh ki MDC bad ia kane hi da lei lei ngim lah ban pdiang namar kane kala pynhiar kyrdan ia baroh ki MDC hapoh Meghalaya” ong u Bah Pyniaid.
U CEM u pyntip “Mynta ka sngi u Secretary jong ka Executive Committee (EC) ula phah daka Legal Notice sha une u Rangbah ba dawa ban pynshai halor ka jingkren jong u”.
