Shillong, Naiwieng 24 : Da ki hajar ngut ki paidbah kila iamih ban leit synran khatduh hapdeng ka jingjaw ummat, ia ka met ba sah jong u Symbud Myntri Rangbah bad MLA barim ka Mawlai Bah Standlington David Khongwir sha u lum jingtep ka Balang Mawlai Presbyterian kaba don ha Mawlai Nonglum.
Ia ka jingleh niam ba khatduh la pynlong da ka Balang Presbyterian Iewrynghep ha ka jingiadonlang ki bahaiing hasem, ki hajar ngut ki paidbah ba wan ai khublei khatduh na kylleng ki shnong ka Mawlai Constituency bad nabar ruh kumjuh.
U MLA ka Mawlai Bah Brightstarwell Marbaniang bad MDC Bah Teiborlang Pathaw kila iadonlang ha ka jingialang sngewlem kaba la pynlong ha Iew Nonglum, Mawlai.
U MLA barim ka Mawlai Bah SD Khongwir, ula khlad noh ha ka 21 tarik Naiwieng ha NEIGRIHMS Hospital ha ka rta ba 90 snem.
U Bah Standling u dei uwei na ki radbah ki kam sain pyrthei ka Jylla naduh ba ka Meghalaya ka ioh iala ka jong ka Jylla ba pura. U dei ruh uwei na ki MLA ba nyngkong eh ka Jylla hadien ba ioh iala ka jong ka Jylla ba pura da ka jingjop ia ka elekshon ha u snem 1972.
U Bah Standling ula long Nongmihkhmat ka Jylla haduh 25 snem kynthih tad haduh u snem 1993 bad hadien kane ula shongthait noh na ka kam sain pyrthei bad khlem mih shuh ban iakhun ia ka elekshon 1998.
Ha ka por kum u MLA, u Bah Standling ula bat ia shibun ki kam hapoh ka Sorkar ba kynthup ia ka shuki DyCM hapoh ka Sorkar ba ialam da u (L) Darwin Diengdoh Pugh bad (L) Brington Buhai Lyngdoh. Ula shakri ruh kum u Myntri ha ki tnad bapher bapher bad kum u Chairman ka State Planning Board.
Nalor ki kam sain pyrthei, ula bat ruh ia ka kam Shnong kum u Rangbah Shnong ka Mawlai Nonglum kaba neh haduh 55 snem kynthih. Ula shah jied nyngkong eh kum u Rangbah Shnong ha u snem 1968 bad bat ruh ia ka kam President ka Mawlai Town Dorbar (MTD) naduh u snem 1988.
