Shillong, Naiwieng 19 : Ka Shillong Cherry Blossom Festival ba lai sngi kynthih kala poi noh sha kaba kut hynne ka miet sngi U Blei da ki jingrwai jong u Nongrwai ba pawnam ka Ri Ireland bad nongrwai barim ka Boyzone Ronan Keating.
Ki jingrwai jong une u nongrwai kala pynshongshit ia ki hajar ngut ki briew kiba la ia rwai bad kynud sur lang ia ki jingrwai bapher bpher ha ka tamasa kaba long ha Madan Kurkalang, Bhoirymbong, Ri-Bhoi District.
Kane ka tamasa kala pynbynnud bha ia kiba bun ki riew ieid tamasa namar ka jinghap ban pynpep noh ia ka sngi ba nyng kong jong ka tamasa namar ka jingpynthut u slap. Hynrei, ka madan kala lynguh hi pum ha ka sngi ba-ar, da ka jingmih rynsan u nongrwai uba la ioh bun ki Grammy Award u NE-YO ban pynshongshit ia ki hajar ngut ki nongwankai.
Ka sngi khatduh lei kala nang shongshit bad ki paidbah kila poi sha ka lympung naduh ka por shiteng sngi ban nym duh ia ka lad ban sakhi dala ki jong ki khmat ia ka jingrwai rynsan jong une u Khlur Nongrwai ka Ireland Ronan Keating.
Kaei kaba synniang sha ka jingjop jong ka tamasa ka dei ka jingthnem ka iew iadie iathied jong ki dukan mar bam bad ki dukan die tiar nala tynrai kaba la khring ia bun bah ki nongshang sawari kiba wan na shabar ka Jylla. Ki dukan marbam kila shlei da ki briew kiba wan sha ka tamasa ban mad ia ki jingbam nala tynrai ka Jylla.
Kane ka tamasa kala pyniohnong bha iaki trai shnong kiba la ioh ia shibun ki jingmyntoi kumba kala paw ha kane ka sngi kut jong ka tamasa. Nalor kane, kala pyniohnong bha ruh ia ki kaitor bad ki duhalia ka Jylla ba kin ioh ban pyni iala ka sap ka phong jong ki ha ka rynsan ryngkat lang ki kynhun bad Nongrwai ba pawnam ka pyrthei kum ka Hybrid Theory bad Ne-Yo.
Ka madan Kurkalang kala sawa jam da ka sur ki paidbah kiba la iarwai lang ryngkat ryngkat bad u Ronan Keating ia ki jingrwai kiba paw jong u ba kynthup ia ka “If Tomorrow Never Comes”, “When You Say Nothing At All” bad kiwei kiwei, kaba pynskhem ia ka nam jong ka Shillong kum ka ‘Rock Capital of India’.
Nalor u Ronan Keating, ka kynhun rwai SANAM kaba tem ia ki jingrwai phlim Bollywood ruh kala pynshongshit bha ia ki paidbah kiba la pynkhih iala ki syngkai, khaweh la ki kti sha suin ryngkat ryngkat ka jingiarwai lang ia ki jingrwai.
Ki nongrwai ka Jylla ruh kum u Wanjop Sohkhlet bad kiwei kiwei, kila pynbyrngia bha ia ki paidbah kiba la mih na kane ka madan da ka jinghun ka mynsiem ba kila iadonbynta ha kane ka tamasa iaput iatem kaba hehduh jong ka Jylla ha ryngkat ka jingsahnud ba kala poi noh sha kaba kut.
