Shillong, Naiwieng 19 : Ka Shillong Cherry Blossom kala lynguh hi pum da ki jingtem jingput, ki jingrwai bad ki jingshad ha ka sngi Ba-ar jong ka tamasa hynne ka sngi Saitjain hadien ka jingpynthut noh u slap ia ka sngi nyngkong ne sngi sdang.
Ki riew ieid tamasa kila khie thiah hynne ka step da ka jingkmen ban iohi ia ka suin bneng kaba khuid kaba shai kdar da ka jingleit noh u slap ka lyer hadien ka jinglynshop hynnin baroh shisngi, kaba la pynlong ia ki bor pyniaid ka tamasa ban pynsangeh noh ia ka sngi sdang.
Ka RBDSA Sports Complex ha madan Kurkalang, Ri-Bhoi kala khapngiah da ki nongleit tamasa kiba la pynmuja ialade da ki jingshad ia ki sur jingtem bad ki jingrwai jong ki riewdonsap ba pawnam ba kynthup ia u nongrwai ba pawnam ka Ri America u NE-YO. Ha kane ka sngi la iadonlang ruh u Myntri ka Tnad sawari Bah Paul Lyngdoh.
“Ka Shillong Cherry Blosson Festival kala long ka dak jong ka jingiatylli bad jingialehkmen, kaba wanrah lang ia ki briew ban ialeh sngewbha ha ryngkat ka mariang bad ka jingriewspah ha ka kolshor. Namar ka jingthut ka suin bneng, ngi la hap ban pynsangeh ia ka sngi ba nyngkong, haba buh hakhmat eh ia ka jingshngain jong ki nongleit tamasa” ula ong.
Ka madan Kurkalang kala sawa jam da ki jingtem jingput bad ki jingrwai jong ki nongrwai napoh ka Jylla bad kiba nabar ri ruh kumjuh, kaba la khring ia ki nongleit tamasa ban shoh biej ia kane ka jinglehkmen.
Ha kane ka sngi, ki nongrwai bad ki kynhun nongrwai kiba la pynbyrngia ia u paidbah ki kynthup ia Hybrid Theory, NE-YO, Meba Ofilia, Pink Panda, Snow White, Rahul Rajkhowa, Banjop, Kenny Music, Gwyneth, CYCO bad Chevinia, nalor kiwei kiwei.
Haba kynthoh ia ka jingshongshit jingrwai u paidbah, u NE-YO ula ong “Ka jingshongshit bad ka jingiakmen u paidbah ka dei ka bym lah ban ianujor. Ka Shillong bad ka Cherry Blossom jong nga, ka ai ka rynsan ia ki nongrwai ba kin pynpaw pyrthei ia ka sap ba ki don”.
