Shillong, Naiwieng 13: U Nongialam ka Liang Pyrshah ha Khasi Hills Autonomous District Council (KHADC) u Bah Titosstar Well Chyne hynne ka Sngi Nyngkong ula ong ba Executive Committee jong ka KHADC kadei ban buh da ka por iaka Delimitation Committee ban pyndep ia ka jingpynbeit ryntih ia ki constituency katkum ka jingbun paid jong ki nongthep vote.
“Ka jingdon iaka Delimitation Committee ka don ar jingmut, kawei kadei lada ka don ka jingpynkylla thymmai iaka Sixth Schedule bad kawei pat ka dei lada ym don ia ka jingpynkylla ia ka Sixth Schedule, ka Delimitation Committee kan pynbeit ryntih ia ki Constituency namar ki don ki Constituency kiba ki nongthep vote ki don haduh 50,000 ngut katba don pat kiba don tang 20,000 ngut ki nongthep Vote…. kumta kadei ban don ka jingiapynbeit ba ki constituency kidei ban ia ryngkat ha ka jingdon ki nongthep vote” ong u Bah TW Chyne haba iakren bad ki nongthoh khubor.
Ula ong, ba mynshwa ha u snem 2014 la leh ia ka Delimitation ha kaba la pynmih thymmai iaka Umsning Constituency bad la pynduh noh ia ka Laitkroh Constituency bad kane ka rukom leh kadei kaba shongaiñ hynrei ka shong pat ha ka EC lano ka ai por iaka Delimitation Committee ba kan pyndep ia katei ka kam.
“Kum u Nongialam ka Liang Pyrshah ngan sa phah da ka jingthoh sha ka EC ba la kumno kumno ka Delimitation Committee kadei ban don ia ka jingbuh por ban pyndep ia ka kam, khnang ba kiba don bynta bad kiba shah ktah, ki paidbha lane ki shnong kin ioh ban phah iaka jingthoh ka jongki ha ka por ba biang” ong u Bah Chyne.
U CEM barim ka KHADC ula ong watla ka KHADC kala pynkhreh ban pynbeit thymmai ia ki katto katne ki konstitwensi katkum ka jingbun paid ki nongthep vote, hynrei kam dei pat ban ktah ne ban pan por ban pynjlan ia ka por jong iingdorbar ka Council hynrei iaka jingpynbeit ryntih ia ki constituency dei ban pynlong hapoh ka shi bnai ne ar bnai.
