Shillong, Naiwieng 13: Ki kamra klas hapoh ka skulbah North Eastern Hills University (NEHU) hynne ka sngi kila thylli namar ka jingbym don ki nonghikai bad kane kala pynlong ruh iaki samla pule ban nym wan satia sha klas.
Kane ka jingthylli ki karma klas kadei namar ka jingiakhih ba khleh pud jong ka Joint Action Committee (JAC) ba kynthup ki Union jong ka NEHUTA, NEHUSU bad NEHUNSA, ban pyrshah iaka jingleh mynthi u Vice Chancellor (VC) ka skulbah NEHU.
La sakhi ba ki samla pule bad ki nonghikai ki don hapoh NEHU hynrei kam shym la don satia ka jingshim klas namar ka JAC kala rai ban iaid beit iaka jingikhih khkem pud sngi.
Lah ban ong ba wat ki samla pule ka skulbah NEHU ruh ki kyrshan iaka rai jong ka JAC ban iakhih khlem pud sngi.
Naka liang u Chairman ka JAC u Prof Lakhon Kma ula ong ba kane ka jingiakhih ka long kaba jop bad ka JAC kan iai bteng ia kane ka jingiakhih katba u VC um pat weng ia u Rohit Prasad uba la shah thung kum Technical Officer/Senior Consultant.
U Prof Kma ula ong “Nalor ka jingdawa wengkam ia u Rohit Prasda, ka JAC ka dawa ruh ban pynurlong iaki mat jingdawa ki samla pule bad ki nonghikai ka skulbah”.
Ula kynnoh ruh ba une u VC u wan hangne ha NEHU tang ban lehkmen ia ki jingmyntoi ba u ioh na kane ka skulbah bad kane ka pynpaw shai ba une u VC ba mynta um pat ibit ban shong ha katei ka shuki kum u VC.
Halor kane ka jingiakhih khlem pud sngi, naka liang ka JAC kala rai ban iai bteng tad haduh u VC u khot iaka jingiakren bad kan iai bteng tad haduh bala pynurlong iaki jingdawa jong baroh ki kynhun kiba don haka JAC.
