Shillong, Naiwieng 12: Ka Hynniewtrep Youth Council (HYC) hynne ka sngi kala dawa naka sorkar pdeng ban ai jingmynjur iaka Meghalaya Residents Safety and Security (Amendment) Bill (MRSSAB), 2020 katba ka dang shong bishar iaka Resolution bala mynjur daka ingdorbar ban pyntreikam iaka Inner Line Permit (ILP) ha Meghalaya.
Haba kren sha ki lad pathai khubor hadien ka jingpymbam smai iaki dkhot ka central executive committee (CEC), u president ka HYC u Bah Roy Kupar Synrem ula ong lada donkam ban jied hapdeng ka ILP bad MRSSAB, 2020, ka HYC kan jied hi iaka ILP.
“Katba ka sorkar pdeng ka dang bishar iaka ILP, ngi dawa naka sorkar pdeng ban ai jingmynjur iaka MRSSAB bad hadien kane ngin sa peit kumno ki kyndon bala bsuh iaka Act ki treikam ne em katkum ka ain” ula ong.
U Bah Roy ula iathuh ba shen ka CEC thymmai kan sa kynduh ia u Myntri Rangbah ka Jylla u Conrad K Sangma ban buddien iaka MRSSAB.
“Ngi la iohi baka tnat Ministry of Home Affairs (MHA) kala pynphai iaka MRSSAB, 2020, kaba la ai jingmut daka HYC shaka sorkar Jylla ka ba long kum ka ILP. Namar kane ngin sa kynduh ia u Myntri Rangbah ban buddien iaka MRSSAB bad iaki jingkylli ka tnat MHA” ula ong.
U Bah Roy ula ong baka HYC kam kyrshan satia ban pyntreikam iaka MRSSA, 2016 namar kane ka ain ka long kaba khlem bniat (Toothless) kaba shu ailad tang ban lum jingtip iaki ba sah wai ha nongbah Shillong.
Kane ka wan hadien baka sorkar jylla kala pyntreikam iaka MRSS Act, 2016 haki 7 tylli ki shnong ha sor Shillong.
U Nongialam ka HYC ula ong ba dang shen ka Meghalaya High Court kala pynbna ba ki khyrdop ki long beain namar katkum ka MRSS Act 2016 kam shym la ai bor iaka sorkar jylla ban pyntreikam iaki khyrdop.
“Namar kane, kim don satia ki khyrdop kiba treikam hapoh Meghalaya namar katkum ka MRSS act 2016 kam don satia ka kyndon ban ai bor iaka sorkar Jylla ban pynieng iaki khyrdop. Namar kane ka HYC ka dawa ban pynkylla iaka iaka MRSSA 2016 ka ban buddien iaka jingwan ne ka jingmih ki briew hapoh ka jylla” ula ong.
Haba kynnoh baka khyrdop ha Umling ka long tang ban khring iaki briew, u Bah Roy ula ong “Ka khyrdop ha Umling kam treikam satia namar kam don satia haki kyndon ban ai bor iaka sorkar jylla ban pynieng khyrdop. Lada khlem pynkylla iaka MRSSA, 2016. Kam don satia ka khyrdop talasi bar jylla”.
