Guwahati, Naiwieng 08 : Ki Pulit ka Assam hynne ka sngi Balang, kila kem ia u MLA ka Congress Aftab Uddin Mollah halor ka jingkynnoh ba ula kynthoh pynjah burom ia ki Nongialam Niam ki Hindu ha ka jingialang paidbah ba long ha Goalpara District.
Ia une u MLA la kem halor ka ejahar bala mudui pyrshah ia u da u Dipak Kumar Das ha Dispur Police Station. Ia une u MLA la kem da ki Pulit ka Guwahati na ka Iingsah jong uwei pat u MLA ka Congress.
U Das ha ka ejahar ula kynnoh ba u Mollah ula kynthoh beain pyrshah ia ki nongialam niam Hindu, kaba la pynmong ia ka jingsngew jong ki riewngeit Hindu.
Kane ka ejahar kala kynnoh ruh ba ka jingkren u Mollah ka long kum ka jingkynshoit ban iashun hapdeng ki Hindu bad ki Muslim, kaba lah ban ktah ia ka shongsuk shongsain ha ka Jylla.
Haba iakren bad ki nongthoh khubor, u Commissioner of Police ka Guwahati Diganta Bara hula ong “Ia une u MLA la kem hynne ka step. La register case pyrshah ia u ha Dispur Police Station hapoh ka kyndon 295 (A), 153 (A) (1) (b) bad 502 (2) jong ka Indian Penal Code”.
Une u MLA haba ai jingkren ha kane ka jingialang paidbah ha Goalpara District ula kynnoh ba ki paid Hindu kila leh ia shibun ki kam sniew ha ka imlang sahlang katba ki Muslim pat kim ju leh satia.
Watla u Mollah hadien ula pan map halor kane ka jingkynthoh kaba la pynbitar ia ki paidbah ha kylleng ki jaka ka Jaka, u President ka Congress Bhupen Kumar Borah ula phah ia ka show cause notice sha u ba bthah ba un ai jubab marmar ba balei ka Congress kam dei ban leh eiei pyrshah ia u.
