Shillong, Naiwieng 04: Watla ka sorkar jylla lyngba ka tnat ka koit ka khiah kala iaid shakhmat ban wanrah noh da kawei ka Company kaban pyniaid iaki kali kit nongpang 108 hapoh Meghalaya hynrei ki nongtrei 108 hapoh ka shatri jong ka Meghalaya EMRI Workers Union kila pynpaw ia ka jingsngewdiaw namar ka jingpaw kyrteng jong ki kompani kiba la don dak sniew.
Kane ka sur jong ka Meghalaya EMRI Workers Union kala mih ha ka jingialang jong ka Union kaba iathir halor ka jingkren ka Myntri ka tnat ka koit ka khiah ka Kong Ampareen Lyngdoh ba pyntip ba ka Sorkar kan sa aiti pyniaid noh ia ka EMRI service sha ki kompani thymmai ha kine ki khyndiat taiew ban wan.
Haba kren sha ki lad pathai khubor u President ka MEMRIWU Bah Roipar Kharraswai ula iathuh ba ha ka jingiakynduh bad ka Myntri ka tnat ka koit ka khiah haka jingdon lang u MD ka National Health Mission (NHM) la pyntip ba ki don haduh 7 tylli ki kompani kiba thep Tender ban shimti ia ka EMRI service ha Jylla hynrei napdeng kine, tang 3 tylli kiba la shah jied kiba kynthup ka Company Global Health Services, ka Medulance bad ka Chikitsa”.
Une u nongialam ka MEMRIWU ula iathuh ba ha ka jingwad bniah jong ki nongtrei shaphang kitei ki 3 tylli ki Company, la shem baka Medulance ka dei kaba la don dak iong ba kam lah ban siew tulop ia ki nongtrei ha ka por Covid.
Ula kam baka Global Health Service ruh ka dei ka kompani kaba iatreilang bad ka Company UKSSA, kaba pyniaid ia ki 108 Ambulance bad 102 ha Delhi. U iathuh ba ha u snem 2018, ka la don ka jingiakhih jong ki nongtrei kane ka komapni namar ba kam shym la siew tulop ia ki nongtrei.
Haba iadei bad ka Company Chikitsa, u Bah Roipar ula iathuh ba kane ka Comapny ka don hapoh ka jingshah tohkit daka CBI ha Rajasthan.
“Katkum ka jingioh jingtip kine baroh 3 tylli kiba ka sorkar Jylla ka thmu ban aiti ban pyniaid iaki kali 108 ha Meghalaya ki don ki dak sniew bad kane ka jingjied jong ka Sorkar Jylla ia kine ki lai tylli ka don eiei sha lyndet. Ngi sngewdiaw ioh ba ka sokrar ka leh bakla ha kane ka jingjied” ula ong.
“Ka jingiakren hi naduh kaba sdang ka long baka Union ka dawa ia ka sorkar ban shimti pyniaid hi ia ka kam hynrei ka sorkar na kiba bun ki daw, ka pyni ba kam lah satia ban leh ia kane bad dei namar kane ngi ieh haka jingstad ka sorkar ban shim iaka rai kaba biang tam” ula bynrap.
Ha kajuh ka por, u Bah Roipar Kharraswai ula pyntip ba ki nongtrei ka 108 ha Meghalaya kim hun satia iaka jingtyrwa ka sorkar ban kyntiew tulop tang 7% man u snem.
Ula ong ba nalor ka tulop, ki nongtrei 108 kila phah ki jingtyrwa (Proposal) shaka sorkar ba kynthup ka Health Insurance, PF, Accidental Insurance, Disable Insurance, ki shuti bad ban pynbun ki nongtrei bad ki kali kit nongpang 108.
