Shillong, Naiwieng 01: Ka Federation of Khasi Jaintia & Garo Peoples (FKJGP) kala dawa na u Myntri ka tnad PHE u Marcuise Marak ba udei ban sei ia ka kaiphod ba la leh ia ki Test kaba pyni ba ka umbam umdih kaba ioh ki paidbah ha Nongbah Shillong, kadei kaba khuid bad kaba shngain.
Kane ka jingdawa ka FKJGP ka la mih hadien ba u Myntri ka tnad PHE u Marcuise Marak hynin ka sngi ula kam ba ka um kaba sam sha ki paidbah ka Nongbah Shillong, kadei kaba khuid bad kaba shngain.
U President ka FKJGP u Bah Dundee C Khongsit ha ka kyrwoh khubor ula ong, ba ka seng ka dap da ka jingsngew lynngoh halor ka jingkynthoh jong u Myntri ka Sorkar jylla uba peit ia ka tnad PHE ha ki lad pathai khubor haba iadei bad ka ishu jong ka Seng ia kaba la pynlong ia ka jingshim um nongmuna ia ki umbam umdih na ki 46 tylli ki kor um na ki kyntoit bapher bapher jong ka nongbah shillong.
“Ka Seng kam sngewpher ia kane ka jingkwah tepiet miaw jong une u Myntri ka tnad PHE namar u hap ban iada rapjot ia ka jingtreikam thurmur jong ka tnad jongu kaba pynpoi ia ki umbam umdih kiba don jingma ia u Paidbah ha ki 44 tylli ki shnong katkum ka kaiphot (Report) ba la ioh da ka Seng lyngba ka State Food Testing Laboratory Pasteur Hills, Shillong” ong u Bah Dundee.
“Ka Seng kala shim ia kane ka sienjam ba nyngkong ban phah shim um nongmuna na ki kor um bad top um na kylleng ki kyntiot bapher bapher jong ka nongbah shillong hadien ka jingujor na kiba bun balang bad ki paidbah na ki Shnong bapher bapher.Khnang ban pynthikna ia kane ka jingartatien jong ki paidbah, ka Seng kala shim ia kane ka bynta ban phah test ia kine ki Um katkum ka jingbthah kyrpang (Standard Operating Procedure) sha ka State Food Testing Laboratory Pasteur Hills, Shillong ym kumba la kynnoh da u Myntri ba imat Seng FKJGP kala leit tong ruma na eiei ne nangno nangno” ula ong
“Kaba sngewsih imat une u Myntri u khlem pat pule imat ia kato ka kaiphot (report copy) kaba ngi kum ka Seng ngi la aiti sha u Myntri Rangbah ka jylla bad phah copy ruh sha u Myntri ka tnad PHE bad Myntri ka Koit ka Khiah jong ka sorkar jylla. Na kata ka daw u sa poi kren klumar kumtei, namar jin ba ula pule yn lap bad tip shai katno tylli ki tyllong ne kor um kiba la phah test bad katno tylli kiba don jingma bad katno tylli kiba shngain” ong u President ka FKJGP.
“Ngi kwah ba u Myntri jong ka tnad PHE u dei ban long khuid (Transparent ) haba iadei bad kane ka bynta namar u ong, ba ka um ba la sam da ka tnad PHE ka long kaba biang bad shngain ban dih namar kila dep Test na Mawphlang Treatment Plant te sngewbha ai ia ki copy jong ki report ba la leh ia kita ki test lyngba ki lad phathai khubor ym ban shu kren tang da ka shyntur. Kane kadei ka kam iap kam im jong u paidbah khamtam u duk u suk namar kum ka Seng ngi kwah ban iada ia u paidbah shwa ban ioh ka jingpang” ong u Bah Dundee.
Ka FKJGP kala buh jingkylli ba tharai lyngba ka jingpynskhem bad jingpynshai jong u Myntri ka PHE ba ka um ba sam da ka tnad PHE ka long kaba la shngain shisha to ai ba ka um ba ki Myntri Sorkar ne ki Heh Sorkar kiba shong ha Secreteriat kin dih beit kumto ia ka um kaba wan tyllong ne top um ba la sam da ka PHE ym donkam shuh ban ia buh ia kaum ha ki Filter ne Aquaguard namar bun na ki longiing bym kot bor ne kiba duk kim ban iohlad kumba buh ma ki ha Secreteriat.
U Bah Dundee ula ong ba ka Seng kan nym shong kli kti halor kane ka ishu kaba ktah im im peit peit ia ka koit ka khiah jong u paidbah bad ula kyntu ia ka Sorkar ba kan leh la ki jong ki kamram halor kane ka bynta.
Pule lang ia kane: Pynthikna u DyCM ban pynkut noh ka Tnad Pulit ia ki kam dawa pisa jubor ha Jylla
Peit lang ia kane
