Nongpoh, Risaw 30: Ki paid Nongrep ka shnong Mawphrew, Ri-Bhoi District kiba don hapoh ka Iasnohktilang Village Organisation, kila pynmih mynta ia ka karkhana pynmih umsoh sohtrun bad ki jingbam bapher bapher na u sohtrun kaba la tip kum ka Pineapple Processing Unit bad Stockard.
Ia kane ka karkhana la plie paidbah hynne ka sngi Nyngkong da u MLA ka Nongpoh Bah Mayralborn Syiem.
Lah ban kdew ba ia kane ka Pineapple Processing Unit and Stockyard la tei lyngba ka jingpynmang skhim na ka Ministry of Tribal Affairs ha u snem 2020-21 ha ka jinglut kaba la mang kumba 70 lak tyngka.
Ha kane ka sngi, la ia donlang ruh ka kong D Sohtun Director ka tnad Horticulture ka jylla, Kong F.N Sun, District Horticulture Officer Ri Bhoi District, Kong D Lyngdoh, District Agriculture Officer Ri-Bhoi District, Bah Anthony Maring Rangbah Shnong, ki ophisar naka tnad Horticulture, ki longkmie hapoh ka shatri jong ka ïasnohktilang VO bad kiwei kiwei ki riew rangbah.
U Bah Mayral Born Syiem, haba kren kum kongsan, u la pynpaw ia ka jingkmen ban sakhi ia ka jingurlong ka jingphohsniew bad ka jingangnud jong ki paid nongrep sohtrun ka thain Mawphrew, kiba la lah ban ioh noh ia la ka jaka buh bad jaka shna jingbam ba bunjait kiba lah ban mih na u sohtrun.
Ula ong ruh ba kane ka thain ka dei kawei na ki thain ha Ri Bhoi District kaba la kiew ha ka kam rep sohtrun bad bun ki nongrep ki im jakpoh na ka jingrep ia u ne u soh bna nam.
Une u MLA ka Nongpoh u la ai ruh ia ka jingiaroh kaba khraw sha baroh ki nongialam bad ki dkhot jong ka Dorbar Shnong, ki paidbah nongshong shnong ha ka jingiatreilang bad ka Village Organisation ba kane ka jingangnud ban ioh ia ka Processing Unit ka la lah ban urlong noh bad kaban long ka jingmyntoi kaba khraw ia ki paid nongrep sohtrun bad u la kitbok kitrwiang ruh ba ki paidbah ha kane ka thain ba kin nang iai kiew na kawei ka por sha kawei pat.
