Shillong Risaw 27: Ka Executive Committee jongka Khasi Hills Autonomous District Council (KHADC) hynne ka sngi Thohdieng, kala lum ia ka jingialang bad ki riewshemphang jong ka Centre of Excellence, MBDA, ka IORA kaba na New Delhi bad ka AKON kaba na ri Netherland ban iaphylliew jingmut na ka bynta ban shim ia ki sienjam ban iada ia ka mariang.
Ia katei ka jingialang la lum da u Chief Executive Member ka KHADC u Bah Pyniaid Sing Syiem ha kaba la iadonlang u Deputy CEM ka KHADC u Bah PN Syiem, ki Executive Member (EM), u Dr S Ashutosh, IFS Retired bad u Director & Co-Chairman jongka Centre of Excellence, u Gunanka DB, IFS uba long ruh u Executive Director jong ka MBDA, ka Dr Lavinia M Dkhar kaba long ka Technical Specialist, Centre of Excellence bad ki nongmihkhmat jongka IORA-ACORN ka kynhun kaba na ka Ri Netherland.
U Bah Pyniaid Sing Syiem ula ong, ka jingialang kala iatai sani bad kala iaphylliew jingmut halor ka jingdonkam ban shim ia ki sienjam ban ialeh ban pynneh pynsah bad ïada ia ka mariang bad la shim ia ka rai ban thaw ia ka Committee ha kaba ka Kong Macdalyn Sawkmie Mawlong kaba dei ka Executive Member kaba khmih ia ka tnad Forest kan longkum ka Khliehduh.
Ula ong, ba kane ka committee kan shimkhia ha kaban pynïaid shakhmat ia ki kam ki jam kiba iadei bad ka Agro Forestry Carbon Finance Project bad ka thong hi, ka long ban ai jingmyntoi ia ki nongrep bad ia ki kynhun kiba don ia ki jaka rep bad ia ki khlaw ki btap.
U CEM ula ong, ba katei ka projek kan ai jingmyntoi ia ki paidbah khamtam ia ki shnong, ki Raid, ki Hima kiba don jaka khlaw ban pynneh pynsah bad ban iada ia ki bad kumjuh ruh ia ka KHADC kaba don 12 tylli ki khlaw kiba heh kumba 1 hectare.
