Shillong, Risaw 26: U Sanjay Kumar Agarwal, Chairman ka Central Board of Indirect Taxes and Customs (CBIC), hynne ka sngi Palei, ula plié paidbah bad shimti ban pyntrei ia ka Solar Street Light Project ha saw tylli ki shnong kiba kynthup ka Mawjrong, Dympep, Laitsohpliah bad Sohrarim kiba hap hapoh ka East Khasi Hills District.
Kitei ki shnong ki jngai kumba 28 haduh 40 km na ka nongbah Shillong, ha ka lynti ban leit sha Sohra, bad bun kiba shong ba sah ha kitei ki shnong kidei ki Khasi.
Haba ai jingkren haka jngialang u Sanjay Kumar Agarwal ula ong ba u sngewhun ba ka CGST bad Customs Zone kila shim ia kane ka sienjam ban pynbiang ia ki solar street light kiba duna jinglut ha ka jingmaramot bad kiba don ruh ki lad ban tyngkai ia ka bording.
U Agarwal ula iaroh ia ki sienjam ban pyntreikam ia kane ka projek hapoh 14 sngi ha ka jinglut jingsep kaba kot kumba T.9 lak naduh ba la sdang saindur nyngkong ia ka.
Katba u MLA ka Sohra Constituency u Bah Gavin M. Mylliem ula ong, ba ka long kaba sngewsarong bad kaba kmen ruh ba u Chairman ka CBIC ula wan jngoh ia ka Sohra bad ula pynpaw ka jingsngewnguh ia ka CBIC kaba la pynbiang ia kine ki solar street light ha kine ki saw tylli ki shnong.
U Rangbah Shnong Bah J.P. Kharkongor ula pypaw ia ka jingsngewnguh na ka liang jong ki nongshong shnong kiba la ioh ia kitei ki street light.
Kine ki shnong kidei kiba rit bad ki nongshnong shnong ki don kumba 600 ngut ha man la kine ki shnong bad ki dang don shibun ki jingduna bad ki nongshong shnong ki hap trei shitom ban kamai jakpoh. Bun ki long ki nongrep bad ki buh ruh ia ki dukan die ja na ka bynta ki nongjngohkai bad kitei ki shnong ki don ha ka lynti ban leit sha Sohra kaba khring bha ia ki nongjngohkai.
Ka ophis jong ka Commissionerate of Customs (Preventive), Shillong hapoh ka Guwahati Zone, kum shi bynta ka Swachhta Action Plan hapoh ka Special Campaign 3.0, ka la pynbiang 49 tylli ki solar street light ha kitei ki saw tylli ki shnong ha ki jaka kiba kongsan bha kumba la jied da ki bor pyniaid shnong.
Kine ki solar light kin iarap bha ia ki nongshong shnong bad kin iarap ruh ban pynthikna ka jingkhuid bad ka jingshngain ha kine ki jaka.
