Shillong, Risaw 26: Ka Hynniewtrep National Achik Movement (HANM) hynne ka sngi Palei, kala pynpaw iaka jingpyrshah ba ka Khasi Hills Autonomous District Council (KHADC) kala ai Trading License kaba treikam haduh 10 haduh 30 snem ia ki bar jylla kiba khaïï pateng ha ka thaiñ Sohra-Majai.
“Ka seng kala ai da ka dorkhas ia u CEM ka KHADC Bah Pyniaid Sing Syiem ban pynpaw iaka jingpyrshah kaba jur ia ka jingai Trading License ia ki bar jylla ban khaïï pateng ha ki jaka kiba hap hapoh ka jingkhmih u Syiem Sohra” ong u Finance Secretary ka HANM South East Khasi Hills u Dan Murphy Nongbri haba iakren bad ki nongthoh khubor.
Ula ong, ba ki bar jylla kila leit mudui sha ka iingkashari pyrshah iaka Hima Sohra bad ka iingkashari ha ka 4 tarik u Risaw 2023, kala bthah iaki ba kidei ban leit sha ka ophis jongka District Council ban shim iaka Trading License na u Secretary jong ka KHADC.
U Bah Nongbri ula ong ba ka KHADC kam dei ban ai Trading License katba kitei ki bar jylla kim pat iohshwa ia ka NOC na ki Dorbar Shnong kumba la kdew haka United Khasi & Jaintia Hills (Trading by Non Tribal) Regulation 1954.
Une u nongialam ka HANM ula pynpaw iaka jingbynniaw iaka rukom ai Trading License ia ki bar jylla kiba khaïï pateng ha katei ka thaiñ.
“Katkum ki kyndon jong ka Trading by Non Tribal, ka jingai lisen khaïï kadei ban treikam tang shi snem, hynrei ki don ki bar jylla kiba la ioh ia ka Trading License kaba treikam haduh 10 snem tam” ong u Bah Nongbri bad kynnoh “Ki don ki ophisar jong ka tnad Trade ha u snem 2006-2007 kila ai iaka Trading License ia ki bar jylla kaba treikam haduh 10 bad on ruh kiba treikam haduh 30 snem tam”.
Ula iathuh ba na ka liang u CEM ula kular ba ka EC kan sa buddien halor katei ka jingai lisen bun snem bad kan sa leh ia kaba donkam.
