Aizawl, Risaw 26 : Ka General Secretary ka Congress Priyanka Gandhi Vadra bad kiwei ki nongialam kynthup ia u Jairam Ramesh bad Shashi Tharoor, kin hiar ialap elekshon ia ki kyrtong jong ka Congress ha Mizoram ka ban iathep vote ha ka 7 tarik Naiwieng.
Haba iakren bad ki lad pathai khubor, u Chairman ka Mizoram Congress Media Cell Lalremuata Renthlei ula iathuh ba ka Priyanka Gandhi Vadra bad u Shashi Tharoor ki lah ban wan sha kane ka Jylla ban pynkhlain ia ki jingialap elekshon na ka bynta ki kyrtong ka party. Kine ki nongialam ki lah ban wan ha ka 3 bad 4 tarik Naiwieng.
Ka Priyanka ka lah ban hiar ialap sha ki bynta ba shathei bad thain sepngi ka Jylla ha kaba sah da ki briew kiba rit paid.
Uwei pat u General Secretary ka Congress bad dkhot ka Rajya Sabha Jairam Ramesh, la khmih lynti ba un poi iuhkjat ha Aizawl ha ka sngi Palei.
Ia u Ramesh un synran da u Inchage ka Mizoram Bhakta Charan Das bad u Nongpeit pyrman Sachin Rao, kiban sa iakynduh ruh ia ki lad pathai khubor ha ka sngi Thohdieng nalor ka jingialang bad ki nongialam ka party.
Kine ki Nongialam ka Congress kin sa pynlong ruh ia ki jingialap elekshon katba ki dang sah ha Mizoram.
U Nongialam ka Congress Rahul Gandhi ula iaid ialap elekshon n aka bynta ki kyrtong ha Aizawl bad Lunglei ha ka jingleit iuhkjat jong u ha kaneka Jylla myn ha ka 16 bad 17 tarik Risaw.
Baroh ki seng sain pyrthei kila pynkhreh shaid shaid ia kane ka elekshon bad kila sdang mynta ia ka jingiaid ialap ha kylleng ki jaka.
Haduh 174 ngut ki kyrtong kila mih ban ia aireng ha kane ka elekshon ba kynthup ia 16 ngut ki kynthei.
Ka Mizo National Front (MNF) kaba synahar ia ka Jylla lem bad ka Liang Pyrshah Zoram People’s Movement (ZPM) bad ka Congress kila pynieng kyrtong ha baroh 40 tylli ki constituency.
Ka BJP kaba la pynieng kyrtong ha ki 39 constituency bad jop tang shi seat ha ka elekshon 2018, mynta ka kynti kala pynieng tang 23 ngut ki kyrtong katba ka Aam Aadmi Party (AAP) kaba dang shu rung thymmai, kala pynieng 4 ngut ki kyrtong ha Aizawl District.
