Aizawl, Risaw 20: Ka seng ki samla pule ka Mizoram ha ka sngi Thohdieng, kala byrngem ban pynlong ia ka jingiakhih ha baroh kawei ka Jylla, ban pyrshah ia ka jingpynieng kyrtong ka Congress da ka kynthei Mizo kiba iashongkha bad u bym dei u Mizo ha kane ka elekshon MLA ban wan.
Ka Mizo Zirlai Pawl (MZP),kaba dei ka seng ki samla pule, kala kyntu ia baroh ki seng sain pyrthei ba kim dei ban ai ticket sha ki bym dei ki paid riewlum khamtam ki kynthei kiba iashongkha bad ki briew ki bym dei ki Mizo.
Ka Congress Party ha Mizoram kala rai ban pynieng ia ka Meriam L Hrangchal na Lynglei South Constituency. Kala iashong kha bad uwei u nong Gurkha uba la kylla Khristan bad bud ia ka jingleh rukom ki Mizo.
Ka Hrangchal ka dei kawei na ki kyrtong kynthei ba pynieng da ka Congress. Kiwei pat ki dei ka Myntri barim Vanlalawmpuii Chawngthu, kaba iakhun na Aizawl South-I seat.
“Ngi la kut jingmut ban iada ia ka kolshor bad jinglong kyrpang ki Mizo nalor ka riti ka dustur. Ngin pynlong ia ki rally ha kylleng ki jaka pyrshah ia ka kyrtong ka congress na Lunglei Soith tad haduh ba weng noh ia ka jinglong kyrtong jong ka” ong u H Lalthianghlima, President ka MZP.
Ka Mizo National Front ba synshar ia ka Jylla bad ka Zoram People’s Movement kila pynieng mar arngut ki kynthei ha kane ka elekshon ban wan. Ka BJP kala pynieng haduh san ngut.
Ka Mizoram ka don haduh 8.51 lak ngut ki nongthep vote. Ka jingiathep vote kan long ha ka 7 tarik Naiwieng bad ka jingniew ia ki vote kan long ha ka 3 tarik Nohprah.
