Shillong, Risaw 19: Ka Sorkar Jylla kala tyrwa ban tei pynheh noh ia saw tylli ki jaka thang briew kiba don ha ki saw tylli ki jaka sor hapoh ka Jylla.
Ia kane la pyntip da u Secretary ka Tnad Social Welfare ha ka kaiphod ba lyngkhot, kaba la aiti sha ka Iingkashari Meghalaya High Court ha ka jingshong bishar ia ka PIL bala ujor da ka Seng Khasi Hills Crematorium hynne ka sngi Palei.
Ha ka hukum, ka Iingkashari ba kynthup ia u Chief Justice Sanjib Banerjee bad Justice B Bhattacharjee, kala ong ba ka kaiphod kala kdew ia ka jingtyrwa ban tei pynheh ia ki jaka thang bala don lypa ha ki saw tylli ki jaka kata ha Shillong, Tura, Jowai bad Nongpoh.
Ka kaiphod kala kdew ruh ia ka sor kaba saw, Nongstoin hynrei kam shym la don satia kano kano ka jingtyrwa ban tei pynheh ia ka jaka thang briew kaba don ha Nongstoin.
Ka Iingkashari ka ong bah aba iadei bad ki saw tylli ki jaka sor kynthup ka Shillong, katto katne ki jingtyrwa ki dei kiba hapoh ka Special Assistance Scheme for Capital Investment 2023-24 hynrei kam shym la don jingkdew sati aba haduh katno ka kam kan iaid ha kane ka jingtyrwa.
