Shillong Risaw 17: Ka Education Cell jong ka KSU East Jaintia Hills District Unit hynne ka sngi Baar, kala phah iaka dorkhas sha u Regional Director ka National Institute of Open Schooling (NIOS) ba dawa ia ki jaka thoh eksam hapoh ka District ban pynsuk ia ki samla pule.
Katkum ka kyrwoh na u Samla Emmon Chyrmang, Education Secretary ka KSU EJHDU, ula pynpaw ba ka seng kala phah ia ka dorkhas kum shi bynta ban wanrah bad pynshai ia u paidbah halor kane ka sienjam jongka sorkar pdeng khamtam na bynta kito ki briew kiba lah ieh shiteng por iaka pule puthi na ka daw ka jingbym kot bor bad ruh kiwei ki daw.
Ka seng kala kyrpad ruh ia ka NIOS ba kan pynlong iaka Awareness Programme lane ki Roadshows kumba lah leh lem ha kiwei ki district bad ruh ban pynshlur ia ki paidbah ka thain ban pynrung kyrteng ha kane ka shlem ai jinghikai.
Ka seng ka khmih lynti ba kiba dei peit kin ioh pdiang ia kane ka shithi ba phah daka seng bad ruh ban peit lem ia ka thain East Jaintia hi baroh kawei.
Ka seng kan sa phah kopi ruh ia kane ka dorkhas sha uba dei peit ia ka NIOS shillong centre,sha ka DSEO, sha u DC bad ruh sha ki District Mission Coordinator ka NIOS bad sha u Director of School Education and Literarcy khnang ba kin buddien lem.
Ka seng kala dawa ruh ban buh ki exam centres ha ka district khnang ba kiba iakhun iaka eksam ba la pynlong daka NIOS kin kham suk haka leit ka wan.
