Shillong, Risaw 16 : U Myntri Rangbah ka Jylla Conrad K Sangma, hynne ka sngi Nyngkong, ula bthah ia ki Heh Sorkar ba kin pynlong ia ka jingtohkit kaba bniah halor ka jingpluh ka Iing ki Singkhania ha Thana Road, Police Bazar bad bthah ruh ba kin leh ia ka Fire Safety Audit hapoh ka Jylla.
U Myntri Rangbah ula bthah ia kane ha ka jingialang bishar kam bad ki heh Ophisar ha ka jingleit jurip ia kane ka jingpluh ka Iing ki Singkhania, bala synran lang da u Chief Secretary ka Jylla Bah DP Wahlang bad u DGP Dr LR Bishnoi lem bad kiwei kiwei ki Heh Ophisar.
Kane ka jingpluh iing kaba la jia ha ka sngi Saitjain, kala shimpor palat 24 kynta ban tehlakam ia ka ding.
U Myntri Rangbah ula bthah ia ki Heh Ophisar ba kin aiti ia ka kaiphod halor kane ka jingjia, kaba la shim ia kawei ka mynsiem briew. Ula bthah ruh iaki Ophisar ba kin pynlong ia ka safety audit jong kane ka Iing bad ban pynthikna ia ki daw jong kane ka jingpluh.
U Myntri Rangbah ula pynpaw ia ka jingsngewkhia na ka bynta kane ka Longiing kaba la shah ktah jur na kane ka jingpluh.
“Kane ka jingjia ka dei kaba buh jingma bha namar ka Iing ka dei kaba don hapdeng ka jaka iew, kaba khapngiah bad kaba buh ha ka jingeh ia ki kali pynlip ding ba kin wan. Ka dei kaba shitom bha, hynrei baroh ki Tnad ba dei khmih bad ki Ophisar khamtam ki Pulit pynlip ding, ki shipai, Air Force, Assam Rifles, BSF, ki bor District bad ki paudbah kila iamih ryntih ban tem ia kane ka jinglong jingman” ula ong.
Ula ai ka jingiaroh ia baroh ki kynhun, kiba pynthikna ba ka ding kan ym pur shabar na
kane ka Iing ba pluh sha kiwei pat ki Iing ba don marjan. Ula pyntip ba kan sa don ka jingtohkit kaba bniah halor kane ka jingjia ban lap ia ki daw jong ka jingpluh ding.
“Ngin sa khmih bha halor kane ka kam bad ngin sa thaw ia ki lad ki lynti ba kumno ngin lah ban tehlakam bad iaid lait ia kum kine ki jingjia hadien habud” ula ong.
Ula ong ba kane ka building ba pluh ka dei kaba bun ki godown, kaba pynlong ia ki kynhun ai jingiarap ban shem jingeh bha ha kaban tem ia ka ding.
U ong ba ka Sorkar kan sa shim ruh ia ka lynti ban leh ia ka Fire Stafety Audit ban pynthikna ba kum kine ki jingjia kin nym mih shuh hadien habud. Ula iathuh ba ka jingialang jong ka Kynhun Myntri ban long ha ka 18 tarik Risaw kan sa iakren halor kane ka kam baroh.
