Shillong, Risaw 09: U Myntri ka tnat pule puthi Rakkam A Sangma ula pyntip ba ka sorkar pdeng kan sa pyllait noh iaka tulop ki nonghikai SSA ka Meghalaya hapoh artaiew ban wan.
Haba kren sha ki lad pathai khubor u Rakkam ula ong “Haduh mynta ka tnat Ministry of Education ka sorkar pdeng kam pat pyllait satia iaka song pisa jong ka 1st Installment. Ngi kyrmen ba ka Sorkar pdeng kan sa pyllait noh ha kine ki kyndiat sngi ban wan”.
U Rakkam ula pyntip ba ka sorkar jylla kala dep ban pynbiang lut ia baroh ki jingdonkam ia kiba la phah sha ka Sorkar pdeng ba kan pyllait noh ia ka song pisa.
“Hadien bala ioh iaka song pisa naka sorkar pdeng, ka sorkar jylla kan sa lah ban siew iaka tulop ba arbnai naka bynta ki nonghikai SSA” la ong u Rakkam.
Haba kylli, u Rakkam ula ong ba kadei ka kamram jong ka sorkar jylla ban siew iaka tulop ki nonghikai bad tang hapoh artaiew ka sorkar jylla ban sa pynurlong ia kane ka jingkular.
Nalor kane u Myntri ula iathuh ba ka sorkar kala dep ban pyllait iaka ong pisa lyngba ka PM-Poshan naka bynta ban siew iaki nongtrei jong ka skhim Mid Day Meal haki skul.
U Rakkam ula ong ba lyngba kane ka song pisa ki nongtrei ka skhim Mid Day Meal kin ioh iaka tulop kaba sah naduh u bnai Iaiong haduh June 2023 bad haka juh ka por ka sorkar jylla kan siew pyndep noh iaka tulop jong baroh haduh u bnai Risaw 2023.
Haba kylli halor ka jingdawa pynkiew tulop ki nongtrei Mid Day Meal, u Myntri ula ong, “Haduh mynta ka sorkar kam pat pynkiew iaka tulop bad kan siew hi katkum kaba kidei ban ioh”.
