Shillong Risaw 07: 27 ngut ki nong Meghalaya kiba leit iaka ‘Holy Tour’ sha Jerusalem, kila sahkut hapoh ka ri Isreal kaba don mynta hapdeng ka thma bad ka ri Palestine.
Katkum ki tyllong khubor la iathuh ba u Member of Parliament (MP) ka Rajya Sabha u Dr WR Kharluki ryngkat bad ka Kurim bad ka Khun kidei kiba napdeng jong kitei ki 27 ngut kiba la sahkut lang hapoh ka ri Isreal.
Da kaba shimkhia mardor halor kane ka jingjia, u Myntri Rangbah ka jylla u Conrad K Sangma ula pyntip haka rynsan Social Media ba ula iakren bad ka Ministry of External Affairs jong ka ri India ban shimkhia ban wan ialam noh da kaba suk ba saiñ ia kine kiba don ha Isreal shapoh ri India.
“27 ngut ki nongshong shnong ka Meghalaya kia la leit iaka ‘Holy Pilgrimage’ sha Jerusalem kila sahkut hapoh Bethlehem namar ka jingmih ka jingiakynad hapdeng ka Israel bad Palestine. Nga lah iakren bad ka Ministry of External Affairs ban pynthikna ba kin wanphai noh sha ïiing da kaba suk” la ong u Myntri Rnagbah ha ka X.
Ka Israel kala pynbna ia ka thma hadien ba ki lehnoh ka ri Palestine kila siat palat 5000 tylli ki namding na ka Gaza Strip shapoh ri Israel hynne ka sngi Saitjaiñ. Haduh mynta kila don 238 ngut ki briew kila duh ia la ka jingim na ka jingshah thombor kynsan ka Isreal ha ki Hamas kaba kadei ka kynhun lehnoh jong ka ri Palestine.
Ki lehnoh jong ka Hamas kila pynbna ia ka “Operation Al-Aqsa Flood” pyrshah ia ka Israel bad kala siat ia ki namding haduh 5000 tylli ki naming ha ka jingsiat kaba nyngkong ia ka ri Isreal.
Haba pynphai kylla ia kane, ka ri Israel kala pynbna thma ha Gaza bad sdang iaka Operation “Iron Swords” ban tehlakam ia ki lehnoh Hamas ha Gaza.
“Ki nongshun ki jong ngi kin hap ban mad ha kata ka rukom, ia kaba kim lah ban shemphang. Ngi don ha ka thma bad ngin sa jop ia ka” ong u Myntri Rangbahduh ka ri Isreal u Benjamin Netanyahu.
Haba ka jingiakynad hapdeng ka Israel bad Palestine kala nang jur, ka ri India kala pynmih iaka jingbthah ia ki nong India kiba don ha ri Israel ba kidei ban long kiba peitngor bad ban shim ia ki lad jingiada.
“Namar ka jinglong jingman hapoh Israel, baroh ki nong India kiba don ha Israel, la kyntu ba kidei ban long kiba peitngor bad ban shim ia ki lad jingiada kumba la bthah da ki bor kiba dei khmih.Sngewbha long kiba husiar, kiar na kano kano ka jingmih jingleit ka bym donkam bad shong ha ki jaka kiba shngaiñ” la ong ka Embassy ha ka jingpynbna.
