Shillong, Risaw 03 : Ka Federation of Khasi Jaintia and Garo People (FKJGP) ha ka sngi kala pynpaw ba ka rai jong ka Sorkar Jylla ban weng ia ki bor Pulit na ki jaka iakajia pud ha khappud ka Meghalaya-Assam ka dei ka jingleh ba bakla.
“Ka Sorkar Jylla I kumba ka bakla sumar ia ka jingpang ba mad da ki briew ha khappud. (Ka jingweng ia ki pulit na jaka iakajia) ka long kumba ai dawai ia kiba pang kpoh da ka dawai ktha khlieh” ong u President ka FKJGP Bah Dundee C Khongsit haba iakren bad ki nongthoh khubor.
Kat kum ka jingong jong u, kane ka rai jong ka Sorkar kan long kumba theh umphniang petrol ha ka ding.
Ula ong ba ki jingeh kin nang sniew shuh shuh haba buh hakhmat ia ka jingbym iasngewthuh ktien thylliej ka ban mih da ka jingleit buh ia ki Central Reserve Police Force (CRPF) ha ki jaka khappud.
“Ha ka jingshisha, ia ki CRPF la buh kum ki bor pahara bynrap ha kino kino ki jingjia kiba mih ki jingkulmar ba pynthut ia ka shongsuk shongsain” ong u bah Dundee.
“Kumta, ngi snegw ba kam iahap ia baroh artylli ki Jylla-Assam bad Meghalaya ban weng noh iala ki jong ki bor Pulit na jaka khappud” ula bynrap.
Ha ka sngi Saitjain, ka jingiakren hapdeng ki Myntri Rangbah ka Assam bad Meghalaya kila rai ban buh noh da ki CRPF kum ki bor pahara bym iashah liang ha ki jaka iakajia pud haba bthah iala ki jong ki Pulit ban kynran dien noh, kaba long kum ka sienjam ban wanrah ia ka jingshaniah ki paidbah ha kaban lah pynbeit noh ia ki jingiakajia pud.
